Kóziniń tirisinde Mádı Qojaulymen jıi suhbattasatynbyz. Ol kisi jýrnalısermen áńgime-dúken qurǵandy jaqsy kóretin. Arhıvimdi qarap otyryp, osydan 7 jyl burynǵy suhbatymnan myna bir úzindige kózim tústi.
– Kishigirim bolsa da, otbasylyq bıznesińiz bar shyǵar?
– Kóp adamdar osylaı oılaıdy eken. «Bıǵalıevte bári bar. Janarmaı quıý beketi, dárihanasy, meıramhanasy, t.b. bar eken» degendi talaı estidim. Shynymdy aıtaıyn, mende tek qana bas dáriger degen laýazymym jáne hırýrg degen mamandyǵym bar. Operasıany jaqsylap jasaı alamyn. Basqa eshteńem joq. Jeke klınıkam da, dárihanam da, janarmaı quıý beketim de joq. Áıelimniń de bıznesi joq.
– Zeınetke shyqsańyz, nemen aınalysasyz?
– Operasıa jasaımyn. Maman hırýrg bolyp eńbek ete beremin. Men mansap, shen qýǵan emespin. Jaýapty qyzmetti senip tapsyrsa, shama-sharqymsha ter tógemin. Al, joq bolsa, qatardaǵy dáriger bolyp ta júrýge barmyn. Denim saý bolsa, kásibim meni ash qaldyrmaıdy.
Al birer jyl burynǵy suhbatymyzda:
"– Alla násip etse, eki jylda paıǵambar jasqa tolasyz. Qarıalyqqa daıyndyǵyńyz qalaı?
– Qazir alpystan astyq qoı. Biraq ózimdi qart sezinbeımin. İshki dúnıem áli jassyń deıdi. Júregim 53-55 jasty kórsetip turǵandaı".
Dep edi-aý. Jaryqtyq. Jaqsy adam edi. Talaı jandy ajaldan arashalaǵany ańyzǵa aınalǵan adam edi. Et pen súıekten jaralǵan adam bolǵan soń, ózimizdiń de, aǵaıyn-týystyń da basy aýyryp, baltyry syzdamaı turmaıdy. Birden Mádı aǵany izdeıtinbiz. Telefony 24 saǵat qosýly turady jáne kez kelgen mezgilde tutqany kóteredi. "Qolymnan kelmeıdi" dep aıtyp kórmepti. Beý, dúnıe!.. Qamshynyń sabyndaı ǵumyr da...
♦Júzdegen adamdy ólimnen qutqarǵan shymkenttik hırýrg nege óz ómirin qıdy?
Arty qaıyrly bolsyn! Bıyl jeltoqsanda paıǵambar jasqa keler edi... Baqul bolyńyz, ardaqty aǵa! Topyraǵyńyz torqa, janyńyz jánnatta bolsyn!
Tutqabaı Fazylbektiń Facebook-tegi jazbasynan
Usynǵan: Gúlim Jaqan
Pikir qaldyrý