Ózbekstanda ótetin aldaǵy kókpardan álem chempıonatynda qazandyqtyń ornyna sheńber paıdalanylatyn bolsa, Qyrǵyzstan quramasy oǵan qatysýdan bas tartady, dep málimdedi eldegi kókpar federasıasynyń prezıdenti Jyrǵalbek Samatov.

Esterińizge sala keteıik, ótken aptada Astanada búkilálemdik kókpar qaýymdastyǵynyń keńesinde kókpardyń halyqaralyq erejesi bekitilgen bolatyn. Jańa ereje boıynsha endi qazandyqtyń ornyna sheńber paıdalanylady. Sondaı-aq, Halyqaralyq janýarlar álemin qorǵaý uıymdarynyń qaǵıdalaryna qaıshy kelmeý úshin serkemen emes, mýlájben oınaýǵa sheshim qabyldandy. Alaıda aıyrqalpaqty aǵaıyndar "ereje Qazaqstannyń yqpalymen bekitilip ketti" dep oılaıtyn sekildi. Qyrǵyzdar sheńbermen oınaýǵa úzildi-kesildi qarsy bolyp otyr.

"Búkil álem kók bórige (kókpar – Red.) qyzyǵýshylyq tanytyp otyr. Qóshpendiler oıyndaryn 1,3 mıllıard adam tamashalap júr, olardyń 90 prosentine kók bóri unady. Bizdiń kórshimiz muny qyzǵanyshtan jasap otyr, olar álemge óz oıyndaryn kórsetýdi qalaıdy. Qazaqtar – baýyrlas halyq, biz olardy qoldaımyz, biraq bul jerde olar artyq ketti. Biz taıqazannan bas tartpaımyz", - dedi Samatov.

Jastar isi, dene shynyqtyrý jáne sport jónindegi memlekettik agenttiktiń dırektory Qanat Amanqulov "qaýipsizdik úshin taıqazannan bas tarttyq degenderi jaı ǵana syltaý" deıdi.

"Biz taıqazandy qaýipsiz etip jasadyq. Jalpy, sporttyń barlyq túrinde táýekel bar. Mysaly, hokeıde oıynshylar búıirge jıi soǵylady", — dep málimdedi Amanqulov.

Onyń aıtýynsha, Qyrǵyzstanda Ózbekstandaǵy chempıonatty ótkizýge arnalǵan taıqazan jasalyp jatyr.

Jyrǵalbek Samatov taıqazannan bas tartý ıdeıasyn tek 5-10 adam qoldap otyrǵanyn, al qalǵandary buǵan múddeli emes ekenin aıtyp ótti.

Aıta ketsek, Qazaqstan quramasy byltyr Dúnıejúzilik kóshpendiler oıyndarynda jartylaı fınalda ózbekterden jeńildi. Osydan keıin ulttyq quramaǵa "qyrǵyzdardan qorqyp, ádeıi jeńildi" degen syn aıtyldy. Qazaqstannyń kókpar federasıasy túsindirgendeı, kóshpendiler oıyndaryna tájirıbe jınaý úshin jas kókparshylar jiberilgen. Qazaqstan kóshpendiler oıyndarynda jalpy esepte 3-oryn alǵan edi. 

Usynǵan: Ásel Bolatqyzy