Kúdikpenen qarap atqan tańǵa ana,
Óz ózinen kóńliń tolmaı barǵa ana,
«Bárin Qudaı biledi» dep qıt etse,
Jarasa ma súıeı salý jarǵa ana?..

Kóńliń tolmaı ózi kelgen yrysqa,
Aıaq asty minez taýyp tyryspa,
Orny tolmas qatelikti jasap ap,
Jaratqannan medet suraý - durys pa?

Qudaı nege, barlyǵyna shydaıdy?
Qudaı nege, óz pendesin synaıdy?
Ana áıgili qaraqshy da qoly qan,
Jaratqannan nege medet suraıdy?

Aramdyqtar - aramdyqqa qosylar,
Bar asqannyń «oıny» túbi osylar,
Baı - kedeı de, han - qara da - nysap joq,
Kesh, opyq jep, Jaratqannan ne surar?..

Mısyz ba ózi sorly pende kállasy,
Bólek pe eken jalbarynyp, sarnasy?
Qatelikke kóp urynǵysh pendesin,
Keshire me, túsip turǵan barǵa isi?..

Jer qoınyna barlyq pende barady,
Jan ushqan soń, súıek qýrap qalady.
Sorly pende túbi ókiner bolǵan soń,
Nelikten kesh Qudaıdy eske alady?

Zańdylyq pa, paqyr týý - batyrdan,
Zańdylyq pa, jaýyn izdeý - jaqynnan?
Jaratqanmen oınaıtyndaı bul pende,
Sonshalyqty kende me ózi aqyldan?

Baılyq kórse, adam nege toımaıdy?
Shegin bilip, qoıar jerde qoımaıdy?
Túbi opyq jep, qalary bar sansyrap,
Jaratqanmen pende nege oınaıdy?..

Barǵanymen buny aıtýǵa batylym,
Jeter emes dál osyǵan aqylym!
Kóp nárseniń paryǵyna barmaıtyn,
O, Jaratqan, men de seniń paqyryń!..

Jumash Kókbóri