Tirligiń mynaý esh mánsiz, bulaı júrgeniń,
Artyńnan qalar urpaǵyń, sirá, bolmasa.
Bes tıyn pulǵa tatymas myń kún súrgeniń,
Júregiń bilim, ımanǵa eger tolmasa...

Jamannan qashqyn, júrekti kirlep almaǵyn,
Jaqsylyǵyńdy bireýge qylǵan jar salma,
Paıdasyz ǵumyr keshken qatarda qalmaǵyn,
Shúkirlik aıtpaı tańyńdy, keshti qarsy alma...

Qadir tut ata-anańdy, baýyr, týysty,
Qolyńnan kelgen kómekti eshbir aıama.
Sadaqa berip, arttyrǵyn saýap ıgi isti,
Sodan soń, Alla buıyrsa, jumaq saıala...

Salaýat degin joǵyńdy joqtap, muńaıma,
Shúkirlik aıtyp, baryńdy bilgin baǵalaı,
Adamǵa, sirá, adam bop qalý ońaı ma,
Árqashan júrgin ımannyń janyn jaǵalaı...

Talaıy keldi, ketti de kelgen pendeler,
Eshkim de máńgi mekendep qalǵan joq jerdi.
Imansyz adam "máńgini" izdep, sendeler,
Ómirdi Alla adamǵa synaq dep berdi. 

Kim ediń keshe, bir ǵana túıir qan ediń,
Nurymen Allah jaratty sendeı bir qulyn.
Musylman bolyp áý bastan týǵan pende ediń,
Taǵdyryń seniń jazyldy ózińnen buryn.

Bilmeımin kútip biz júrmiz neni, ne kimdi...
Qam qylmaı ańsap jannattan úmit etemiz.
Jalǵan dep beker aıtpaǵan mynaý bes kúndi,
Keshegi ata-babadaı biz de ketemiz...

Ashýǵa erik beremiz, sabyr shet qaldy,
Dúnıe oılap uıqymyz qashty tún jarym,
Jel sózderge de erdik te, qulaq, jaq taldy,
Bilemiz bizdi shaqyrǵan sózsiz "ún" baryn...

Bolmashy iske jylaýǵa daıyn turamyz,
Alla atymen bastalmaıdy da sóz basy.
Qalardaı máńgi qas-qaǵym sátti quramyz,
Qurandy oqyp tamýy kerek kóz jasy.

İsime mynaý qarap em eshbir mandymas,
Sanamdy aldy jaýlap bir Kórkem kúsh búgin.
Sezimge erik berdim de, kózden tamdy jas,
Paıdasyz ótip jatqanyn bildim ár kúnim.

Ketpeshi, Iman, bir sát te menen jyraqtap,
Qaldyrma nápsi erkine erer mezetke.
Turamyn budan bylaı ózimdi suraqqa ap...
Qandaı is kútip tur eken meni kezekte...

Bir Óziń jar bop, birlikke daqty túsirmeı,
Jerimdi saqta, Jaratqan, saqta halqymdy,
Tákkaparlyqty, erinshektikti ósirmeı,
Umyttarmashy urpaqqa "dástúr-saltyńdy".

Salmaǵy sózdiń júrekke tússe salmaqty,
Júrekten shyǵyp júrekke, sirá, jetkeni...
Saqtaı alsaq biz "qazaǵym" degen tarmaqty,
Úreı men pále-jalanyń bizden ketkeni...

Ketpesem de áli júrsem de jerdi mekendep,
Saǵynam keıde qazaǵym menen jerimdi.
Beremin ýáde "Qazaǵym" deýmen ótem dep,
Sebebi, maǵan "Qazaqtyń"(!) jany berildi...

İlgeri-keıin... bilip te, bilmeı istegen,
Keshirshi, Alla, úlkendi-kishi kúnámdi...
Súremin jalǵan Sen bergen Uly kúshpenen,
Tyrysam endi qylmaýǵa tirlik kúmándi.

Ketpeshi menen alystap, ıman, oı, sanam,
Búginde meniń ózderiń ǵana dostarym...
Armanym-jumaq, bilemin: sabyr... ol-panam...
"Alla atymen" isimdi endi bastarmyn...

Haıyryn kútem, qaısybir istiń bolmasyn,
Sebebi, bári Allanyń ǵana qalaýy.
Dostarym, endi qabaqty kirbiń shalmasyn,
Sebebi, bizde qaldy-aý kúnder sanaýly...

***

Juma

Jalbarynyp Jaratqannan tilek tilep,
Jumaqty ańsamaıtyn joq esh pende,
Jaqsy amaldy qylamyz «shashyp... kúrep»...
Jarym júrek búginde sen de, men de... 

Umtylsaq qulshylyqqa,izgi isterge,
Umytpas Jaratqanym jaratqanyn.
Uttyrmasań ýaqytty jat «kúshterge»,
Uly Allanyń kúter eń tańy atqanyn. 

Máńgi Tiri, Kirshiksiz, Kórkem Alla!
Máńgúrttik kúıge bizdi túsirmeshi?
Mıpalaý sekildegen bul jalǵanda,
"Mısıamdy" oryndaýǵa ýaqyt bershi?... 

Aýzynan Alla esimi túspese eger,
Adamnyń amaldary qabyl bolar.
Armandasa duǵamen jyldam berer,
Alaqanǵa haıyrly baqyt qonar...

Maqpal Sembaı