Bola ma, erte ólem dep qamdanýǵa?
Bola ma, kesh ólem dep aldanýǵa?
Bul ólim — bireýge erte, bireýge kesh,
Bola ma, kelgenine tańdanýǵa?..

Bireýge — baqyt, birdiń — kúıigimiz,
Osyndaı bizdiń naqty syıyǵymyz.
Tirlikte: "Ataq!", "Dańq!", "Baılyq!.." dedik
Al qane, sodan shyqqan múıizimiz?

Jaman sóz aıtylmaıdy ketken janǵa,
Ómirden armansyz bop ótken bar ma?
Nemene Arman degen, sol Armanǵa
Tirlikte armansyz bop jetken bar ma?

Ólgennen arttaǵyǵa sabaq bar ma,
Ólgennen tirilerge jaýap bar ma?
Ómirden kesh kettiń be, erte óttiń be,
Báribir anaý Uly Jaratqanǵa!..

Bolsa da toǵyz qabat oqqaǵary,
Bolsa da kóp kıimi, kóp tamaǵy,
Óńmeńdep ólmeıtindeı kún keshkender
Ómirden qas-qaǵymda joq bolady.

Kór baılyq kózińdi aldap jalańdaıdy,
Bul pende órekpıdi, tanaýraıdy.
Altynyń, asyl buıym, bar qazynań
Ajaldan seni aıyryp qala almaıdy.

Baılyǵyń — ǵumyryńa tutqa bolmas,
Jegeniń — jumyryńa juq ta bolmas.
Asta — Taq, qolyńdaǵy — sheksiz Bılik
Ajaldan tóte kelse qutqara almas!

Tirlikte arpalystyń, shyryldadyń,
Bireýge shyǵyndaldyń… shyǵyndadyń…
Bolmastan bir kúngideı barlyǵy da
Keýdeńnen ushyp shyǵar shybyn janyń!

Pendeniń kórer sory, qonar baǵy,
Ótkinshi oıyn-kúlki — olar daǵy.
Dúnıe búlinbeıdi "sen óldi!" dep,
Eshteńe bolmaǵandaı bolar bári.

Bárimiz osy aıtqandy bilgenmenen,
Tirlikte arpalysyp júrgenmenen,
Sońǵy ret ókingeniń kimge kerek,
Shybyn jan shyqqan kezde qý keýdeden?!.

Bul ómir — tirligińde kúres bolar,
Alysyp-julysý men tires bolar.
Ólgende bir jaqyny sorly pende
Jalǵannyń jalǵandyǵyn bir eske alar.

Onysy ertesinde-aq umytylar…
Óıtkeni erteńinen úmiti bar.
Az kúngi qyzyǵyna maldanady
Bári de — quntsyzy, qunyty bar…

"Men!", "Men!" dep shyqqanmenen daýsyń qansha,
Júresiń aınalshyqtap aýsyl malsha.
Óziń de, ózgeni de aldaýmenen
Kún keshtiń tatar dámiń taýsylǵansha.

Tirshilik: jylatady… kúldiredi…
Jasaıdy, qaıta bárin búldiredi.
Dúnıe alma-kezek bolyp keler
Osynyń maǵynasyn kim biledi?..

Áıeliń, týǵan-týys, bala-shaǵa
Bola almas bul ajalǵa arasha da.
Ólimniń bar ekenin bilip turyp,
Qumarmyz nege az kúngi tamashaǵa?!!

Jumash Kókbóri