Ótken jyly 60-tan astam joǵary laýazymdy sheneýnik memleketke 900-ge jýyq baǵaly syılyq ótkizdi dep jazady Qamshy.kz aqparat agenttigi Sputnik Qazaqstan saıtynyń deregin negizge alyp. 

Qazaqstannyń sheneýnikteri sheteldik qonaqtardan alǵan baǵaly syılyqtaryn memleketke ótkizip jatyr.

2015 jyly Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmetkerlerge kez kelgen syılyqty alýǵa zańmen ("Sybaılas jemqorlyqqa qarsy is-qımyl týraly"– Sputnik) tyıym salǵan. Ony alǵan adam syılyqtyń qunyna, kólemine qaramastan, jazaǵa, tipti qylmystyq jaýapkershilikke tartylýy múmkin.

Qarjy mınıstrligine qarasty Memlekettik múlik jáne jekeshelendirý departamentiniń bólim basshysy Ernur Qaıyrbektiń aıtýynsha, 2018 jyly memlekettik organdardaǵy joǵary laýazymdy qyzmetkerler 900-ge jýyq syılyqty memleketke ótkizipti.

"Ótken jyldyń qorytyndysy boıynsha 60-tan astam memlekettik qyzmetker bizge 900-ge jýyq syılyq ótkizdi. 800-ge jýyq zatty memlekettik organdarǵa tapsyryp, qalǵan 120-dan astamyn aýksıon arqyly sattyq. Nátıjesinde memleketke 700 myń teńge paıda tústi", - dedi ol.

Sondaı-aq bólim basshysy sheneýnikterdiń qandaı syılyqtardy ótkizgenin aıtyp berdi.

Osy oraıda ol laýazymdy qyzmetkerlerdiń baǵaly nege ótkizip jatqanyn túsindirdi.

"Biz basshylardyń syılyqty tapsyrǵan-tapsyrmaǵanyn teksermeımiz. Ony memlekettik qyzmet isteri jáne sybaılas jemqorlyqqa qarsy is-qımyl agenttigi tekseredi. Olar 2 AEK-ke (5050 teńge) deıingi somadaǵy syılyqty alsa, ol ákimshilik quqyq buzýshylyq bolyp sanalady. Al syılyqtyń baǵasy 2 AEK-ten (5050 teńge) assa, basshy qylmystyq jaýapkershilikke tartylýy múmkin. Sondyqtan olar "bálesinen aýlaq" dep baǵaly syılyqtaryn bizge tapsyrady", - dedi ol.

Sheneýnikter tapsyrǵan barlyq zat www.gosreestr.kz portaly arqyly aýksıon arqyly satylady. Oǵan elimizdiń kez kelgen azamaty qatysa alady. Tek ol Halyqqa qyzmet kórsetý qyzmeti ortalyǵynan elektrondy sıfrly qoltańbasyn alsa bolǵany. Keıin atalǵan saıtqa kirip, satyp alǵysy keletin zattyń kepildik jarnasyn tóleýi kerek.  

Mysaly, portalda dúkende 145 000 – 194 000 turatyn Apple watch saǵaty 66 257 teńgege, elimizde sırek kezdesetin, qymbat uıaly telefon Huawei P9 Plus 95 179 teńgege, 290 000 teńgeniń Garmin Fenin 5S caǵaty 71 959 teńgege, saýda úıinde 167 000 teńgege satylatyn Montblanc qalamy bar bolǵany 65 453 teńgege satylyp ketken.

"Ótken jyly saıttaǵy aýksıon arqyly 120-dan baǵaly syılyq satyldy. Iaǵnı Apple watch saǵaty 66 myń 257 teńgege, Montblanc qalamy 65 453 teńgege, Huawei P9 plus uıaly telefony 95 179 teńgege, 12 dana kádesyı 95 200 teńgege, Garmin Fenin 5S caǵaty 71 959 teńgege ótken, taǵy basqa zattar satyldy. Nátıjesinde memleketke 700 myń teńge kóleminde paıda tústi", - dedi Ernur Qaıyrbek.

Sonymen qatar bólim basshysy satylmaǵan zattyń joıylatynyn atap ótti.

"Biz aýksıon arqyly zattyń baǵasyn tómendete beremiz. Satylmasa taǵy da memlekettik organdarǵa usynamyz. Olar almaǵan jaǵdaıda ǵana zatty joıamyz. Biraq osy kúnge deıin mundaı jaǵdaı bolǵan joq. Óıtkeni zatty joıýǵa búdjetten aqsha bólinedi. Al bul – memleket úshin shyǵyn", - dedi ol.

Sóz sońynda Ernur Qaıyrbek sheneýnikter tapsyrǵan syılyqtar arnaıy qoımada saqtalatynyn, qazyna qarjysynan zattardy saqtaýǵa, tasymaldaýǵa jylyna 6-7 mıllıon teńge bólinetinin málim etti.

Usynǵan: Ásel Bolatqyzy