Mańǵystaý oblystyq polısıa departamenti Jańaózen qalasynda bılikten jumys berýdi talap etip, narazylyq bildirgen turǵyndardyń keıbirin "polısıa qýdalaǵany" týraly aqparatty joqqa shyǵardy dep habarlaıdy Qamshy.kz aqparat agenttigi Azattyqtyń deregin negizge alyp. Departamenttiń baspasóz hatshysy jýrnalısiń Jańaózendegi jaǵdaı týraly suraǵyna:
- Ýchaskelik polısıa ókilderi bos jumys oryndary jármeńkesi óter aldynda úılerdi aralap, soǵan shaqyrtý habarlamasyn taratqan. Qalada jaǵdaı qalypty, tynysh. Eshkim qamalǵan joq, aıyppul da salynbaǵan, - dep jaýap berdi.
Buǵan deıin Jańaózen qalasynda bılikten jumys berýdi talap etken keı turǵyndar quqyq organdarynyń ókilderi jumyspen qamtý ortalyǵyna kelýdi surap úılerine jıi barǵyshtap ketkenin aıtyp shaǵymdanǵan bolatyn. Qala turǵyny Serik Baqtybaıuly birneshe turǵynnyń "kóshede temeki tuqylyn tastaǵany" úshin ákimshilik jaýapqa tartylǵany jáne ózi de polısıa basqarmasyna shaqyrtý alǵanyn habarlaǵan.
2011 jyly birneshe aıǵa sozylǵan jumysshylar narazylyǵy polısıanyń halyqqa oq atýyna ulasyp, beıbit adamdar qaza tapqan Jańaózen qalasynda sońǵy eki aptadan beri áleýmettik narazylyq kúsheıgeni baıqalǵan.
Turǵyndar bılikten keminde 150-200 myń teńge eńbekaqy tóleıtin, úkimetke qarasty kásiporyn ashýdy talap etken. Bılik áleýmettik narazylyqty basý úshin 23 aqpanda eńbek jármeńkesin uıymdastyryp, bos jumys oryndaryna 3 myńnan astam ótinish qabyldanǵanyn habarlaǵan bolatyn.
Keı turǵyndar eńbek jármeńkesinde Aqtaý qalasynan aılyǵy 70-80 myń teńge bolatyn jumys usynylǵanyn, ondaı aqsha otbasyn asyraýǵa jetpeıtinin aıtyp narazylyq bildirgen.
Jańaózendegi negizgi jumys kózi - "Ózenmunaıgaz" aksıonerlik qoǵamy men "Qazaq gaz óńdeý" zaýyty. Resmı statısıka boıynsha, qalada 130 myńnan astam adam turady. 2018 jyldyń alǵashqy tórt aıynda Mańǵystaý oblysynda jumyssyzdyq deńgeıi 4,8 paıyzdy quraǵan.
