Jańa Zelandıadaǵy terakti kezinde aman qalǵan ındonezıalyq stýdent qandyqol qylmyskerden qalaı qashqany týraly aıtyp berdi dep jazady Qamshy.kz aqparat agenttigi BBC saıtynyń deregin negizge alyp. 

Irfan Iýnıanto sol kúni meshittegi kishkentaı bólmede tańǵy namazyn oqyp bolyp, ýaǵyz tyńdap otyrǵan. Bir kezde syrt jaqtan qatty daýys estiledi. 

"Bir kezde oq atylǵanyn estidim. Sodan keıin qasha jóneldim. Men ózim otyrǵan bólmedegi qosalqy esikten shyǵyp kettim. Sodan keıin meshittiń artyndaǵy turaqqa bardym. Turaq jaqta birneshe adamnyń qaqpadan sekirip jatqanyn kórdim. Maǵan bir jigit kómektesti", - deıdi aman qalǵan jigit. 

♦28 jastaǵy qylmysker meshittegi atysty vıdeoǵa túsirgen (vıdeo +18)

Onyń aıtýynsha, eńbek demalysyndaǵy dáriger 15 shaqty adamdy óz úıine kirgizgen. Olardyń ekeýi jaraqat alǵan. 

"Eńbek demalysyndaǵy dáriger bizge kómek kórsetti. Sondaı-aq ol óte qonaqjaı eken. Bizge tamaq pen sýsyn usyndy", deıdi Irfan Iýnıanto. 

Olar 5 saǵatqa jýyq syrtqa shyqpaı otyrǵan. Polısıa qyzmetkerleri kelgen soń ǵana úıden shyǵypty. 

"Biz qatty qoryqtyq. Kóshege shyǵýǵa bata almadyq. Ásirese shabýyl jasaǵan adamdy kezdestirýden qoryqtyq", - deıdi Irfan Iýnıanto. 

Eske sala ketsek, juma kúni tańerteń Jańa Zelandıa halqy ǵana emes kúlli musylman qaýym qara jamyldy. Jańa Zelandıadaǵy 2 meshitke shabýyl jasaldy. Kraıscherch qalasyndaǵy  Ál-Nur meshitinde 49 adam kóz jumdy. Brenton Tarrant óziniń bul áreketin terakti dep baǵalady. Sondaı-aq ol bolǵan oqıǵany vıdeoǵa túsirgen.