Shymkenttegi «PK Inspiration» seriktestigi qyz-kelinshekterge arnalǵan shulyq toqýmen aınalysady. Italıandyq tehnologıamen jabdyqtalǵan kásiporyndaǵy ozyq ınovasıalyq tehnıka tilin jergilikti mamandar jetik ıgergen. Bul týraly 24.kz aqparattyq portaly jazady. «Shymkentte jasalǵan» degen belgisi bar áıelder shulyǵy álemdik sapaǵa saı toqylyp, otandyq naryqta saýdaǵa shyǵarylyp jatyr. Ońtústiktiń brendine aınalyp úlgergen ónimniń baǵasy ózge eldikinen áldeqaıda arzan.
Bir qyzyǵy, uulyq toqıtyn qondyrǵylardy negizinen er azamattar basqarady. Óndiris basshysy Mýtal Shamahsýmov stanoktardaǵy árbir jipti jiti baqylap júredi. Óıtkeni tehnıka múlt ketse, qanshama ónim jaramsyz bolyp qalady deıdi ol.
Mýtal Shamahsýmov, «PK Inspiration» JSHS óndiris basshysy: «Biz óz qolymyzben jasaǵandyqtan, ónimniń qandaı bolatynyn dóp basyp aıta alamyz. Óıtkeni áıeldiń neni qalaıtynyn er-azamattan artyq eshkim bilmeıdi. Qondyrǵyǵa qajetti baǵdarlamany ózimiz jasaımyz. Toqımyz, sosyn qyz-kelinshekterge usynamyz.»
Otbasylyq bıznesti órkendetip júrgen kásiporyn basshysy Italıa men Germanıadaǵy seriktesterimen birigip, osy jobany qolǵa alǵan. Sońǵy úlgidegi jabdyqtar shulyqtyń túr-túrin toqyp shyǵarady. Shıkizat Eýropadaǵy jetekshi kompanıalardan ákelinedi. Toǵyz túrli jip qoldanylady. Quramynda sozylmaly zaty bar materıaldar qosylǵan shulyqtar shydamdy keledi deıdi mamandar. Otandyq ónim sonysymen de erekshe.
Svetlana Elıstratova, «PK Inspiration» JSHS baqylaýshysy: «Biz negizgi jumystardy atqaramyz. Al Italıada bul jumystardy er-azamattar jasaıdy eken. Toqý stanogynan bizge shulyqtyń alǵashqy toqylǵan bóligi tútikshe retinde keledi. Osynda qajetine qaraı ekige bólip, bir-birine jalǵap, tigip shyǵamyz. Sosyn yńǵaıly bolady.»
Kásiporyndaǵy barlyq tehnıka kompúter kómegimen basqarylady. Aldyn ala dızaınerler qajetti zattyń túri men keskinin jasap alady. Qondyrǵy sol jobaǵa qarap shulyqty ózi toqıdy. Taǵy bir artyqshylyǵy — qalaýyńyzǵa qaraı iri jáne maıda torly etip, sonymen qatar shulyq betine sýret toqýǵa da bolady eken. Maýsymyna qaraı ónimniń túsi de ózgeredi. Ázirge kásiporyndaǵy úlgini ıtalıalyq dızaıner jasap jatyr.
Býshını Maýro, tehnolog-dızaıner: «Bul — óte jaqsy ári sapaly ónim. Maǵan qatty unaıdy. Ónim óte muqıat jáne uqypty tigiledi. Bizdiń bul salada tájirıbemiz kópteý. Sondyqtan bilgendi úıretip jatyrmyz.»
Seriktestik aıyna osyndaı 45 myń dana áıelder shulyǵyn toqýǵa qaýqarly. Óndiristik kompanıa buıymdaryn elimizdegi dúken sórelerimen qatar sheteldegi iri saýda keshenderinen de kórýge bolady. Bastysy – otandyq ónim ońtústik jurtynyń maqtanyshyna aınalyp keledi.
