Shymkenttegi «Rixos Khadisha Shymkent» qonaq úıinde aımaqtyq VIII «Áıel jáne bıznes» konferensıasy ótti. Bul týraly bnews.kz aqparattyq portaly jazady. Ońtústik Qazaqstan oblysy ákimdigi janyndaǵy áıelder isteri jáne otbasylyq-demografıalyq saıasat jónindegi komısıa men «KMF» shaǵyn qarjy uıymy, «KMF-Demeý» KQ, Qazaqstan halqy Assambleıasy, Qazaqstannyń isker áıelderi qaýymdastyǵy uıymdastyrǵan konferensıaǵa kásipker áıelder, mıkroqarjylandyrý salasyndaǵy sarapshylar, Qazaqstan Respýblıkasynyń memlekettik jáne qarjy ınstıtýttarynyń jáne kásipkerlikti qoldaýdyń basqa da qurylymdarynda jumys isteıtin qyz-kelinshekter qatysty.

Jıynǵa qatysqan 120-dan astam isker áıelderdi oblys ákiminiń orynbasary Erbol Sadyr shýaqty kóktemniń alǵashqy merekesi 8 naýryz – halyqaralyq áıelder kúnimen quttyqtap, denderine saýlyq, otbasylaryna amandyq tiledi. Konferensıanyń negizgi maqsaty — áıelderdiń qoǵamdaǵy rólin arttyrý. Áıelderdiń iskerlik belsendiligin damytý, bıznesti júrgizý boıynsha tájirıbelik bilim almasý, iskerı baılanystardy ornatý jáne damytý bolatyn.

«Bıyl — Qazaqstan halqy Assambleıasynyń 20 jyldyǵy. Bizdińshe, turaqtylyq tatýlyqty talap etedi. Al elimizdegi tatýlyq — bıznestiń damýynyń bir sebebi. Bir shańyraqtyń astynda barshamyzdyń tatý-tátti ómir súrýimizdiń arqasynda elimizdegi bıznes qarqynmen damyp kele jatqanyn nyq senimmen aıtamyz.»

«Búginde memleket kásipkerlikti qoldap, qýattap otyr. Sýbsıdıa berip jatyr. Ońtústik Qazaqstan oblysynda kásipkerlik damyǵan. Kóbi otbasylyq bıznespen aınalysady. Aımaqta kópbalaly otbasylar kóp. Bul da otbasylyq bıznestiń damýyna sep bolýda. Menińshe, otbasylyq kásiptiń bolashaǵy bar. Bul tek qana bıznes emes, jastardy jumyspen qamtý ekenine de kóńil bólgenmiz abzal» deıdi «KMF» shaǵyn qarjy uıymynyń Shymkent qalasyndaǵy fılıal dırektory Kúlsara Saparbekova.