Nursultan Ábishulynyń Qazaqstan halqyna jasaǵan málimdemesi tarıhı sheshim boldy. Búgin bolmasa erteń mundaı úndeý jasalaryn bilgenbiz. Sondyqtan teledıdardan Elbasyn kórip otyryp, kózimizge jas keldi. Keıin «nelikten janarym jasqa toldy?» dep oılandym. Kóp uzamaı sebebi de anyqtaldy. Sóıtsem, Nursultan Ábishuly ákemizge aınalyp ketken eken ǵoı. Quddy úıdiń otaǵasy jol júrgeli jatqan kezdegideı sezimdi bastan ótkerdik. Biraq Allaǵa shúkir, Elbasymyz aman-esen. Onyń Aqordada otyratynyna táýbe dedik. Tarıhtyń dońǵalaǵy esh ýaqytta toqtamaıdy. Ylǵı alǵa jyljyp otyrady. Jańalyq bolyp otyrýy da – zańdylyq. Jańa urpaq kele jatyr. Nuraǵa olar úshin qoldan kelgenniń bárin jasady dep oılaımyn.

Ol – búgingi qazaqstandyqtardyń aǵasy, bolashaq qazaqstandyqtardyń atasy. Myń qazaqtyń qolynan kelmeıtin sharýalardy otyz jyl ishinde Nuraǵańdaı bir qazaq jasady.

Sońǵy myńjyldyqta qazaqtyń basynan ótpegen, jańa táýelsiz Qazaqstan syndy alyp ǵımarattyń irgetasyn óz qolymen qalaǵandaı boldy. Árıne, el irgesin qalaýǵa barsha Qazaqstan halqy atsalysty. Biraq sol halyqty baǵyttaǵan, «Táýelsizdik» dep atlatyn qubylystyń arhıtektory – Elbasy. Mańdaıyna jazylǵan mindetti shamasy kelgenshe, kúndiz kúlki, túnde uıqy kórmesten atqardy. Qazaq ertegilerindegi Tolaǵaı syndy qımyldap, otyz jyldyń ishinde Qazaqstandy álemge tanytty. Elimizde turatyn túrli ult ókilderin bólip-jarmastan, qurmet tutatyn, baýyrmal, jany keń, darhan ekenin jer júzine tanyta bildi.

Bir baıqaǵanym, Elbasymyz – keń peıildi adam. Jaqsynyń aldynda adam tartylmaıdy, qysylmaıdy. Bul kisi Memleket basshysy bola tura qarapaıym keıipten taıǵan emes. Óz basym N.Ábishulynmen úsh-tórt ret kezdesip, suhbattastym. Solardyń bárinde onyń adamǵa salmaq salmaı, kerisinshe keńistik berip, kótermelep otyrdy. Tipti týǵan aǵamyzben tildesip otyrǵandaı kúı keshkenimiz bar. Prezıdenttiń osy qasıetin erekshe syılaımyn. Qurmet tutamyn. Osy mámilesine baılanysty jaqyn arada hat joldaýdy josparlap otyrmyn.

Qazaqstan ekonomıkasy sonaý toqsanynshy jyldarmen salystyrǵanda ondaǵan ese kúsheıdi. Elimizde alyp lokamatıv dep qarastyrsaq, táýelsiz Qazaqstan óz dańǵyl jolyna tústi deı alamyz. Sondyqtan joǵaryda atap ótkenimdeı, Elbasyn ákemiz dep qabyldap ketken ekenbiz. Memleket basshysy qyzmetin Qasym-Jomart Toqaevqa senip tapsyrdy. Ol kisi de – júrekti, etek-jeńi keń pishilgen azamat. Elimizdi alǵan baǵytynan taıdyrmaı, ármen qaraı alyp júredi dep senemiz. Bir ǵana tilegim – kúlli qazaqstandyqtar osyndaı sátte kók týdyń astynda jınalsa eken. Týymyzdy bıikke kóterýimiz kerek. Ol el bedeliniń ármen qaraı ósýine áser tıgizedi. Halyqtyń birligi myqty bolaryna senemin. Biz osy oraıda Nuraǵamyzǵa alǵys aıtyp, Qasym-Jomart Kemelulyna qoldaý bildirgenimiz jón.

Smaǵul ELÝBAI, jazýshy: