QR prezıdenti Qasym-Jomart Toqaev «Qalamqas» ken ornyndaǵy órtke baılanysty áleýmettik jelide pikir bildirdi dep habarlaıdy Qamshy.kz aqparat agenttigi.
«Úkimetke «Qalamqas» ken ornyndaǵy órtti toqtatyp, tótenshe jaǵdaıdy qalypqa keltirý jóninde tıisti sharalar qabyldaýdy tapsyrdym. Bul másele meniń baqylaýymda», - dep jazdy Memleket basshysy Tvıtterdegi paraqshasynda.
Eske salyp óteıik,
2019 jylǵy 13 naýryzda «Mańǵystaýmunaıgaz» AQ-ǵa qarasty Qalamqas ken ornynyń kúrdeli ýchaskesinde uńǵymanyń qurylysy barysynda ken ornynyń ortalyq bóligine tán tehnogendik sıpattaǵy gaz-sý aralas tabıǵı burqaǵy shyqqan. Naýryzdyń 13-24 kúnderi mamandar kúrdelendirilgen burǵylaý eritindisimen uńǵymany jýý jónindegi jumystardy, sondaı-aq grıfondardy joıý úshin jóndeý-oqshaýlaý jumystaryn júrgizdi.
2019 jylǵy 25 naýryzda saǵat 05:46-da 8232 uńǵymanyń aýmaǵynda 16 naýryzda jer betine shyqqan gaz-sý qospasynyń oshaǵy jana bastady. «Semser – Órt sóndirýshi» JSHS jaýyngerlik tobynyń shaqyrylǵan orynǵa kelý ýaqyty 05 saǵat 58 mınýt. Qurban bolǵan jáne zardap shekkender joq.
2019 jylǵy 25 naýryzda saǵat 14:30-ǵa qaraı órtti aýyzdyqtaý úshin qosymsha Aqtaý qalasynyń MÓQQ 6 órt sóndirý toby kelip jetti: 4 avtosısterna, 1 jyljymaly sorǵy stansasy, 1 gaz-sý sóndirýshi avtomobıl.
Qazirgi ýaqytta órt shyqqan jerde Mańǵystaý oblysynyń TJD, «Semser – Órt sóndirýshi» JSHS jáne «Faır protekshn LTD» JSHS jeke quramynyń 53 adamy jáne órt sóndirý tehnıkasynyń 12 birligi jumyldyrylǵan.
Usynǵan: Gúlim Jaqan
