Almatyda Qurmanǵazy men Baıseıitova kósheleriniń aýmaǵyndaǵy kólikturaqtardyń birinde Olımpıada chempıony Dmıtrıı Balandınniń kóligine ury tústi dep habarlaıdy Qamshy.kz aqparat agenttigi inAlmaty.kz saıtyna silteme jasap.
Dámhanada dostarymen birge túski asyn iship shyqqan sportshy kóliginiń aınasynyń qoldy bolǵanyn kórip, birden polısıaǵa habar bergen. Tártip saqshylary jedel jetip, tıisti qujattar toltyrǵan.
"Toyota Land Cruiser kóligin Olımpıadadan keıin syıǵa tartyp edi. Bir aınasy 400 myń teńge shamasynda turady. Biz Denıs Tendi óltirip ketken jerge jaqyn mańda otyrdyq. Adamdar aına urlyǵyn áli de qoımapty, qalaı yzalanbaısyń. Halqymyz túk te ózgermeıdi eken", - dedi Dmıtrıı Balandın.
Eske sala ketsek, bir jyl buryn dál sol aýdanda Qazaqstandyq mánerlep syrǵanaýshy, Sochı Olımpıadasynyń qola júldegeri Denıs Ten kólik urylarynyń qolynan qaza tapqan bolatyn. Osy jyly Almatynyń qylmystyq ister jónindegi mamandandyrylǵan aýdanaralyq soty qylmyskerlerge úkim shyǵardy. Nuraly Qıasov pen Arman Qudaıbergenov 18 jylǵa, al Janar Tolybaeva 4 jylǵa sottaldy.
Usynǵan: Maqpal Sembaı
