Iraktyń ońtústigindegi Nadjaf qalasynda álemdegi eń úlken ári kóne musylman zıraty ornalasqan. Vadı as-Salam (Álem alqaby) dep atalatyn ol zıratta 1400 jyldan beri musylmandardy jerlep keledi. Jalpy aýmaǵy 600 gektardy quraıdy.

Derekterge sáıkes, onda paıǵambarlar, ǵalymdar men patshalar jerlengen. Adam ata men Nuh paıǵambardyń da qabiri Nadjafta desedi.

Sonymen qosa, Álem alqabynda tek paıǵambarlar men ǵalymdardan ózge, Aýǵanstan, Úndistan, Irak, Kýveıt, Lıvan, Pákistan elderiniń qarapaıym musylmandary da jerlengen.

Qazirgi ýaqytta zıratta álemniń túrli aýmaǵynan 5 mıllıonǵa jýyq musylmannyń qabiri bar eken. Qabirler bir-birimen tyǵyz ornalasqan, ár musylmanǵa bir sharshy metrden keledi. Mundaı tyǵyzdyqqa qaramastan, ár qabirdiń arasynda adam júretin joldar da bar.

Qabir tastary kúıdirilgen kirpishten nemese gıpsten jasalǵan. Otbasylyq qabirler de kezdesedi. Otbasylyq qabirler ásirese XX ǵasyrdyń 30-40 jyldaryna tán.

2010 jyldyń orta tusynda Álem alqaby IýNESKO-nyń álemdik mura eskertkishteri tizimine engizildi. Al 2012 jyly Islamdyq bilim, ǵylym jáne mádenıet uıymy nusqasyna sáıkes, Nadjaf qalasy ıslam mádenıetiniń astanasy ataldy.

Usynǵan: Gúlim Jaqan