UQK Shymkent qalasy boıynsha departamenti Ulttyq ulannyń arnaıy bólimshesin qatystyrýmen turaqty túrde jergilikti bıznesmenderden iri aqshalaı qarajatty qorqytyp alýmen aınalysqan uıymdasqan qylmystyq toptyń 6 múshesin ustady dep jazady Qamshy.kz aqparat agenttigi otyrar.kz saıtynyń deregin negizge alyp.   

Qylmystyq toptyń músheleri birqatar zorlyq-zombylyq, onyń ishinde atys qarýyn qoldanýmen qylmystar jasady dep kúdiktelýde.

Uıymdasqan qylmystyq toptyń negizin buryn aýyr qylmystar jasaǵany úshin birneshe márte sottalǵan destrýktıvti dinı aǵymdy ustanýshylar quraǵan.

Banda múshelerin ustaý olardyń kezekti kásipkerden kúsh qoldanýmen jáne onyń ómirine qaýip tóndirýmen 10 000 AQSH dollaryn qorqytyp alý sátinde júzege asyryldy.

Birqatar tintý júrgizilip, uıymdasqan qylmystyq top músheleriniń qarý-jaraq arsenaly bar jasyryn oryn anyqtaldy,  5 birlik atys qarýy jáne olarǵa oq-dáriler alyndy.

Qazirgi ýaqytta olardyń dinı sebepter boıynsha qylmystyq quqyq buzýshylyqtar jasaýynyń yqtımal faktileri tekserilýde.

Usynǵan: Ásel Bolatqyzy