7 sáýir kúni Bishkekte 2010 jylǵy sáýir oqıǵasynda qaza tapqandardy eske alýǵa arnalǵan mıtıń-rekvıem ótti. Sharany Qyrǵyzstannyń áleýmettik-demokratıalyq partıasy uıymdastyrdy. Mıtıń spıkeriniń biri eldiń eks-prezıdenti Almazbek Atambaev boldy.

Spıker retinde qolyna mıkrofon alǵan Atambaev qazirgi prezıdenttiń keı áreketin synǵa aldy. Sonymen qatar İİM men UQK basshylaryna zańdy buzbaýyn talap etti.

«Bıyl 63-ke toldym. Áýlıe emespin, jańylystym, halyq aldynda kináli boldym. Naǵyz musylman retinde kinámdi moıyndaımyn. Shyn sózim – osy. Moınyńa aýyr kiná artylsa, ony ashyq aıta bilýiń kerek. Halyqtan emes, qudaıdan qorqamyn», - dep monologyn bastady Atambaev.

«30 jyl buryn qudaı maǵan úıip-tógip baılyq berdi. Qalanyń dál ortalyǵynan meshit salýǵa jer taptym. Qala syrtyndaǵy zaýyttardy satyp aldym, basshylarmen kelisimge keldim. Bar qıyndyqty ótkerdim. Al qazir baılyqtyń da, bıliktiń de keregi joq. Qyrǵyzstanda taza, ádil bılik ornasa deımin. Jastar beker qan tókpese eken. Buryndary 2005 jylǵy naýryz revolúsıasyn urlaǵan Bákıev dep aıtýshy edi, qazir Jeenbekovtyń bıligi sáýir revolúsıasyna qol suǵyp jatyr. Men soǵan alańdaımyn», - dedi Atambaev.

Eks-prezıdenttiń sózinshe, qazirgi bılik kinásiz adamdardy torǵa qamap otyr. «Meni de túrmege jappaq. Odan da óltire salyńdar, halqym din-aman bolýy úshin ózimdi qurban etýge daıynmyn. Men aldandym. Aınalamda bári «Sooronbaı – seniń dosyń» deıdi, qalaısha aldanbaısyń? Konstıtýsıa boıynsha prezıdent azamattardyń erkindigin, quqyǵyn shektemeý kerek. Biraq Jeenbekov Konstıtýsıaǵa qarsy shyǵyp jatyr», - dedi taǵy.

«Eń bastysy elimizde tynyshtyq bolsa eken. Alaıda bılik halyqqa qarsy kúsh qoldansa, is nasyrǵa shabady. Halyqtyń qahary kúshti, ony toqtatý múmkin emes. Sol úshin «toqtańdar!» degim keledi. Muny men aıtpaǵanda kim aıtady? Men shyqpaǵanda kim shyǵady? Qajet bolsa, jalǵyz ózim «Aq úıge» baramyn.

Halyq taǵy kóterile me dep qorqamyn. «Jeenbekovti Atambaev ákeldi» dep aıta ma dep alańdaımyn. Halyq meni qashyp ketedi dep oılaıdy, biraq meniń únimdi óshirýdiń jalǵyz joly – ólim. Túrmede de únsiz jatpaspyn. Qudaı men halyq aldynda aqpyn. Eshqaıda qashpaımyn, bul – meniń elim, Otanym!» - dep sózin qorytyndylady Atambaev mıtıńide.

Aıta keteıik, ótken aptada Joǵarǵy Keńes eks-prezıdentterge qol tıgizbeý quqyǵynan ajyratý jóninde zań jobasyn úshinshi oqylymda bir daýystan qabyldady.

Buǵan deıin Konstıtýsıalyq palata «eks-prezıdentke qol tıgizbeý quqyǵyn alyp tastaý sońǵy prezıdentke ımpıchment jarıalaý prosedýralarynan jeńil bolmaýy kerek» degen pikirin bildirgen.

«Prezıdenttiń kepildikteri jónindegi» zańǵa ózgertý engizý boıynsha Joǵarǵy Keńestegi «Ónúgúú-Progress» fraksıasynan Isqak Masalıev pen «Respýblıka – Ata uýrttan» Kýrmankýl Zýlýshev usynys bildirgen. Parlament bul zań jobasyn byltyr jeltoqsan aıynda birinshi oqylymda kópshilik daýyspen maquldaǵan.

Eks-prezıdentke qol suǵylmaýdy alyp tastaý jóninde alǵash ret 2018 jyly Bishkek Jylý elektr ortalyǵyndaǵy apattan keıin kóterildi. Depýtat Masalıev buǵan tikeleı prezıdent Almazbek Atambaevtyń qatysy baryn aıtqan.

Usynǵan: Gúlim Jaqan