Álem jelidegi belsendilerdiń barlyǵy kezekten tys prezıdenttik saılaý jarıalanǵaly beri jarǵaq qulaqtary jastyqqa tımeı jantalasýda. Ásirese opozısıalyq baǵyttaǵy oqyrmandar men atqaminerler ortaq pikirge kele almaı, túrli usynystar aıtylýda.

Birqatar belgili baspasóz quraldarynyń bas redaktory qyzmetin atqarǵan, opozısıalyq partıalarda múshelikte bolǵan Gúljan Erǵalıova da áleýmettik jelidegi paraqshasynda kúnde dóńgelek ústel ótkizýde.

"Ashynǵan azamatsha mıllıondaǵan halyqtyń kózge uryp turǵan dúnıeni kórse de, kórmegendeı bolatyn muz qatqan sanasyna narazymyn. Zal toly kórermen, jańǵyrǵan shapalaq úni, ótirik baǵdarlama, qorqynysh – bári bizdiń damýymyzǵa kedergi", - dedi ol jazbasynda.

Sondaı-aq, Gúljan Erǵalıeva elimizde halyqtyń kóshbasshysy bolyp júrgen adal azamattar bar ekenin de jasyrmaıdy. Olardyń kópshiligi sottalǵanyn, memlekettik mekemede jumys jasaı almaǵanyn nemese jasamaǵanyn, arzan hám ótirik baǵdarlama jazyp, halyqty aldamaǵanyn aıtady belsendi.

Jazba sońynda ol ózi laıyq dep sanaǵan alty úmitkerdiń atyn atady.

Marǵulan Seısembaı – tájirıbeli kásipker ári belsendi azamat.

Rınat Zaıytov – halyqtyń súıikti aqyny, aıtysker.

Janbolat Mamaı – iri potensıaldy jýrnalıs ári saıasatker.

Zeınolla Kákimjanov – isine adal eks-mınıstr jáne tabysty kásipker.

Jannat Ertlesova – bilikti ekonomıs, ýaǵynda Qazaqstannyń Demokratıalyq tańdaýy partıasynyń belsendi múshesi.

Gennadıı Golovkın – álemniń sýper-chempıony, jeńilisti bilmeıtin batyr.

Qoǵam belsendisiniń oıynsha, qazirgi ýaqytta bılik basyna el súıetin azamat kelýi tıis. Biraq onyń artyndaǵy saılaýdyń Zań turǵysynan alǵandaǵy máseleleri, qarjy, partıa nemese qoǵamdyq qozǵalystyń atynan shyǵý syndy qıyndyqtary kóp-aq.

Eske sala keteıik, Ýkraınada da prezıdenttik saılaý naýqany júrip jatyr. Úsh kandıdattyń biri, belgili akter Vladımır Zelenskııdiń halyq daýysynyń basym bóligine ıe bolǵanynan da habardarmyz.

Eger bizde de prezıdenttik saılaýǵa ónerimen, óleńimen súıikti bolǵan azamattardyń iri saıasatqa, halyqaralyq saıasatqa at qoıyp, aralasyp ketýi ekitalaı dúnıe.

Biz úmitkerge daýys bererde memleket turǵysynan oılanýymyz qajet. Qansha qurylys jobalary, ınfrastrýktýralar, tartylýy tıis ınvestısıalar, josparlanǵan iri jobalar aıaqsyz qalmaýy tıis. Halyqtyń kópshiligi qazirgi ýaqytta áleýmettik ál-aýqattyń artýyn ǵana kózdeıdi, talap eter basty dúnıeleri de – osy.

Tutqa ustar uldyń saıasatkerligi, adaldyǵy, qazaqylyǵy, azamattyǵy, abyroı-bedeli qatar baǵalanýy tıis.