Kezekten tys prezıdent saılaýynyń ýaqyty jarıalanǵaly beri halyqtyń pikiri san tarapqa bólindi. Árqaısysynyń óz ýáji bar.
Ásirese, «Tasmaǵambetov saılaýǵa túse alady ma?» degen suraq halyqtyń basym bóliginiń sanasyna tynym bermeýde. Túrli laýazymdy qyzmetterdi atqara júrip, eldiń súıiktisine aınalǵan Imanǵalı Nurǵalıuly qazirgi ýaqytta Qazaqstan Respýblıkasynyń Reseıdegi tótenshe jáne ókiletti elshisi jaýapkershiliginde.
28-sáýirge deıin qabyldanatyn úmitkerler arasynda Tasmaǵambetovtiń tóbe kórsetýi jumbaq kúıde qalyp otyr.
Zań ne deıdi?
El arasynda «elshige saılaýǵa qatysýǵa ruqsat joq» degen qaýeset jeldeı esip júr. Rasynda solaı ma?
"Saılaý týraly" konstıtýsıalyq zańǵa sáıkes, myna adamdar prezıdenttikke kandıdat bola almaıdy:
- zańda belgilengen tártippen ótelmegen nemese alynbaǵan sottylyǵy bar adam;
- sot sybaılas jemqorlyq qylmysyn jáne sybaılas jemqorlyq zań buzýshylyǵyn jasaǵany úshin kinásin zańda belgilengen tártippen tanyǵan adam;
- sottyń áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndarynda otyrǵan azamattardyń saılanýǵa quqyǵy joq.
Sondaı-aq, memleket basqarýdan úmitti adamǵa qoıylatyn kelesideı talaptary jáne bar:
"Týmysynan Qazaqstan azamaty, qyryq jasqa tolmaǵan, memlekettik tildi meńgergen, Qazaqstanda sońǵy on bes jylda turatyn jáne joǵary bilimi bar respýblıka azamaty saılaýǵa túse alady. Konstıtýsıalyq zańda prezıdenttikke kandıdatqa qosymsha talaptar qoıylýy múmkin. Buǵan qosa, prezıdent bolyp saılaný úshin azamattyń memlekettik qyzmette nemese saılanbaly memlekettik laýazymdarda keminde 5 jyl jumys tájirıbesi bolýy, sondaı-aq belsendi saılaý quqyǵy bolýy tıis".
Ortalyq saılaý komıteti ne deıdi?
Atalmysh organ múshesi qoǵamdyq birlestikter atynan usynylǵan kez-kelgen kandıdatýra muqıat qaralatynyn aıtty.
Sondaı-aq, ortalyq saılaý komıtetiniń múshesi Záýresh Baımoldına Imanǵalı Nurǵalıulynyń saılaýǵa túsý múmkindigi týraly qoıylǵan suraqqa tikeleı jaýap bermeı, onyń memlekettik qyzmetker ekenin, eger usynylyp jatsa sózsiz tekseriletinin aıtyp ótti.
"Kandıdattyń qujattaryn kórmeı jatyp, naqty jaýap bere almaımyn. Ortalyq saılaý komısıasy alqalyq jıynda úmitkerdiń talaptarǵa sáıkestigin qarap, sheshim shyǵarady", - dedi ol.
Sózin odan ári jalǵaǵan OSK múshesi ýaǵynda prezıdenttik saılaýǵa dıplomatıalyq qyzmet atqarǵan Ǵanı Qasymovtyń da úmitker bolǵanyn tilge tıek etip, ózgeshe emeýrin tanytqandaı boldy.
«Toıdyń bolǵanynan «boladysy» qyzyq».
Barlyq úmitkerlerdiń esim-soıy aldaǵy eki jeti ishinde jarıalanbaq. Qyzyqtyń «kókesi», áne, sonda bastalady.
