Qazaqstanda kezekten tys prezıdent saılaýynyń ýaqyty jarıalanǵaly beri boljamdar, pikirler, aıtys-tartystar tolastamaı tur. Bulardyń barlyǵy alǵashqy úmitkerler belgili bolǵan kúnnen bastap saıabyr tappaq.

"Baıtaq bolashaq" ekologıalyq alánsy" Respýblıkalyq qoǵamdyq birlestiginiń quryltaıshylary biraýyzdan prezıdenttikke kandıdat retinde Azamathan Ámirtaıdy usyndy.

Bul týraly Azamathan Ámirtaı óziniń áleýmettik jelidegi paraqshasynda jarıalady.

"Qurmetti dostar, "Baıtaq bolashaq" ekologıalyq alánsy" Respýblıkalyq qoǵamdyq birlestiginiń quryltaıshylary meni Qazaqstan Respýblıkasynyń Prezıdentine úmitker retinde usynǵan soń jan-jaqtan tolassyz qoldaýlar kelip jatyr. Ásirese kásipkerlik qaýymdastyqtary, táýelsiz jýrnalıser, ekologıa janashyrlary, ultshyl ári patrıot aǵaıyndar jáne elimizdiń tanymal tulǵalary óz qoldaýlaryn bildirip jatyr. Men úshin bul kórsetilgen senim óte mańyzdy!!! Kóp raqmet sizderge!" - dep jazdy ol.

Ózin qup kórgen azamattarǵa alǵysyn jaýdyrǵan azamattyń aldaǵy ýaqytta qandaı baǵdarlama daıyndap, qandaı máselelerdi kóterip, naýqanda qalaı jumys jasaıtynyn ýaqyt kórseter.

Biraq el kókeıinde túıtkil bolyp turǵan bir másele bar. Áleýmettik jelidegi jazba 13-sáýirde jarıalanǵan. Sodan 4 kún buryn, ıaǵnı, 9-sáýirde Azamathan Ámirtaı "Atameken Business" arnasyna bergen suhbatynda tómendegideı oı aıtady:

"Ekolog retinde óz pikirimdi aıtsam, prezıdent Qasym-Jomart Toqaev "Kók Jaılaý" máselesin toqtatyp, durys sheshim qabyldady. Bul ekologtardyń da saıası alańǵa shyǵyp jatqanyn kórsetedi. Ekolog retinde biz prezıdenttikke laıyqty kandıdat retinde Qasym-Jomart Toqaevtyń ózin kórip otyrmyz".

Bul neniń kórinisi? Birneshe "kandıdat" qatysqan "balamasyz" saılaýdyń anonsy bolar, bálkim?!

Áleýmettik jelidegi materıaldar men jazbalardyń aýjaıyna qarap, Azamathan Ámirtaı, Asqat Asylbekov syndy azamattardyń nıettene bastaǵanyn ańǵarýǵa bolady.

Qalaı bolǵan kúnde de, naqty aqparat Ortalyq saılaý komıteti jarıalaǵan aqparat bolady. Oǵan deıin toı dúbiri qyzǵan ústine qyza beredi, qyza beredi...