Donald Tramp 2020 jyldyń 3 qarashasynda ótetin prezıdenttik saılaýǵa qazirdiń ózinde 41 mıllıon dollar jınap úlgerdi. Bul az aqsha emes. Bul týraly  derekterdi  Bloomberg basylymy jarıa etip úlgerdi.

Anyǵyna kelsek, bul sońǵy úsh aıdyń ishinde jınalǵan qarjy. Sarapshylardyń aıtýyna qaraǵanda, bul ózimen básekeles bolyp otyrǵan eki kandıdattan da eki ese kóp. Aıta ketý kerek, Demokratıalyq partıadan usynylyp otyrǵan eki úmitkerdiń biri Bernı Sanders 18,21 mıllıon, al Kamala Harrıs 12 mıllıon dollar jınaǵan. Eki kandıdattyń jınaǵan aqshasynyń ózi Trampqa jetpeı otyr. Soǵan qaraǵanda, prezıdenttik saılaýǵa qaıtadan túsý úshin Tramp jarna jınaý jaǵynan qara úzip ketetin shyǵar. Onyń ústine Respýblıkalyq partıanyń Ulttyq komıteti taǵy da 45,5 mıllıon dollar jınalǵanyn málim etti. Donald Tramptyń barlyq jınalǵan aqshasy sonymen 86 mıllıon dollardan asyp otyr. 

Soǵan qaraǵanda, keler jyldyń 3 qarashasynda ótetin AQSH-taǵy prezıdenttik saılaý óte qyzyqty ótetin syqyldy.

Ázirge óz úmitkerlerin usynyp otyrǵan Demokratıalyq partıanyń Ulttyq komıteti qansha qarjy jınalǵanyn ashyp aıtqan joq.

Bul ǵana emes, Donald Tramp elde ártúrli sharalar ótkizý arqyly jarna jınaýdy jalǵastyryp jatyr. Sáýir aıynyń sońynda ol  San-Antonıo men Los-Andjeleste úlken shara ótkizbek. Onyń eń qymbat bıleti 150 myń dollar turady jáne bul isker azamattar jınalatyn jıynǵa Prezıdenttiń ózi qatysyp, erkin pikir almasý alańy  bolady.

2016 jylyǵy prezıdenttik saılaýda prezıdent Donald Tramp negizinen óz qarjysyn jumsaǵany belgili. Bul jolǵy saılaýda ony jaqtaýshylardyń qatary men múddeles kásipkerler kóbeıip keledi. Qazirdiń ózinde 82 mıllıon dollar jınalyp otyrǵanynyń ózi Tramptyń «osal jaý» emestigin kórsetedi.