QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenteniniń uıymdastyrýymen «Qazmunaıgaz» AQ qarasty «QazMunaıTeńiz» jaýapkershiligi shekteýli seriktestiginde sybaılas jemqorlyqqa qarsy is-qımyl máseleleri boıynsha semınar ótkizildi. İs-sharaǵa Agenttiktiń aýmaqtyq departamentiniń, Sybaılas jemqorlyqqa qarsy is-qımyl Ulttyq búrosy Mańǵystaý oblysy boıynsha departamentiniń basshylyǵy, munaı kompanıasynyń basshylyq quramy men qyzmetkerleri qatysty.
Alǵashqy kirispe sózinde aýmaqtyq departament basshysy Nurgúl Jannazarova Agenttiktiń basym baǵyttarynyń biri qoǵamda sybaılas jemqorlyqqa qarsy mádenıetti qalyptastyrý ekendigin, paraqorlyq sıaqty qoǵamdy jaılaǵan keselmen kúresýge búkil jurtshylyqty tartý mindeti turǵandyǵyn, sonyń ishinde sheteldik, ulttyq munaı-gaz jáne basqa da óndiristik kompanıalary da, kvazımemlekettik sektor men jeke menshik mekemeleri de bul qozǵalystan shet qalmaýy qajettigin atap ótti. Spıker sonymen birge, jemqorlyq derekteri úshin ákimshilik jáne qylmystyq jaýapkershiliktiń qarastyrylǵandyǵyn, al shetel jáne ulttyq kompanıa ókilderine óz kezeginde tıisti organdarǵa der kezinde habarlap, qylmystyq áreketterdiń aldyn alý kerektigin basa aıtty.
Budan basqa, Nurgúl Jannazarova óńir deńgeıinde keń kólemde ashylǵan «Adaldyq dúkenderine» de toqtaldy. Atap aıtqanda, oqý oryndary, halyqaralyq áýejaı, qalalyq polısıa basqarmasynda, arnaıy mamandandyrylǵan halyqqa qyzmet kórsetý ortalyǵynda ashylǵan bul erekshe dúkender jas urpaqty adaldyqqa, turǵyndardy áleýmettik jaýapkershilikke baýlıdy jáne de osyndaı «satýshysyz dúkenderdi» munaı kompanıalary da qoldap, kásiporyndarda ashýǵa jumystanýda. Sonymen birge, Nurgúl Almasqyzy osyndaı formattaǵy túsindirme jumystaryn tek ortalyq keńse deńgeıinde emes, munaı ken oryndaryndaǵy jumysshylarmen de ótkizýge usynys bildirdi.
Sybaılas jemqorlyqqa qarsy is-qımyl Ulttyq búrosy Mańǵystaý oblysy boıynsha departamenti basshysynyń orynbasary Baqdáýlet Mahmýd túsindirme sharalarynyń basty maqsaty qoǵamda úreı týǵyzý emes, kerisinshe sybaılas jemqorlyqtyń prevensıasy, ıaǵnı aldyn alý bolyp tabylady. Ulttyq búro ókiliniń aıtýynsha, kompanıalarǵa qatysty memlekettik satyp alý, tender ótkizý, kadrlardy irikteý úrdisin barynsha ashyq, turǵyndarǵa qoljetimdi etýdiń, ınternet-resýrstardyń múmkindikterin keń qoldaný qajettigin usynym retinde jetkizdi. Spıkerdiń aıtýynsha, kompanıa basshylyǵy men laýazymdy tulǵalardyń arasyndaǵy qylmystyq sybaılastyq oryn alsa, tek para alýshy emes, para berýshi de qylmystyq jaýapkershilikke tartylady.
Aýmaqtyq departamentiń memlekettik kórsetiletin qyzmetter basqarmasynyń basshysy Jasulan Marshakuly «Digital agent» mobıldik qosymshasymen tanystyryp, kórsetiletin qyzmetter nátıjesin baǵalaýǵa, qońyraý shalý arqyly aýmaqtyq departamentke óz ótinishteri men oń pikirlerin qaldyrýǵa múmkindik berilgendigin eksperıment negizinde kórsetti.
Munaıshylar sol boıda «Digital agent» mobıldik qosymshasyn óz smartfondaryna júktep, tıisti nómirge qońyraý shalyp, operatormen baılanysyp, endigi jerde memlekettik organdardy jaǵalamaı, úıde otyryp ta kez-kelgen qyzmetke aryz-shaǵymyn qaldyra alatyndyqtaryna kózderin jetkizdi.
Tyńdaýshylarǵa sonymen birge «Protecting business and investments» jobasynyń prezentasıasy ótkizildi. Iaǵnı, zań talaptaryn aınalyp ótip, bızneske qysym kórsetkisi kelgen memlekettik organ ókilderine qatysty sheteldik jáne otandyq ınvestorlar aryz-shaǵymdaryn óńirlik front-keńsege arnaıy 8707 170 1424 shuǵyl jelisine habarlaý arqyly tikeleı jetkizip, aýmaqtyq departament tarapynan shuǵyl áreket etiletindigi baıandaldy.
İs-shara barysynda jemqorlyqqa qarsy sıpattaǵy beınerolıkter kórsetilip, kompanıa qyzmetkerleriniń usynys pikirleri qabyl alyndy. Departament ókilderi munaıshylardy semınar barysynda aıtylǵan paıdaly aqparatty tek ózderi bilip qana qoımaı, týysqandary men dos-jarandaryna da jetkizip, qoǵamda sybaılas jemqorlyqqa qarsy mádenıetti qalyptastyrýǵa jáne memlekettik kórsetiletin qyzmet sapasyn kóterýge óz úlesterin qosýǵa shaqyrdy.
