1 mamyrda Nur-Sultan, Almaty, Semeı, Qaraǵandy jáne Aqtóbe qalalarynda Bas prokýratýranyń resmı habarlamasyna qaramastan,sanksıalanbaǵan mıtıńiler men azamattardyń jınalýy oryn aldy. Osyǵan baılanysty Qazaqstan Respýblıkasy İİM Baspasóz qyzmeti málimdeme taratty.

Aksıaǵa qatysýshylarǵa ózderiniń ustanymdary men áleýmettik jáne basqa da problemalyq máseleler boıynsha pikirlerin erkin jáne ashyq bildirýge múmkindik berildi.

Alaıda Nur-Sultan jáne Almaty qalalarynda jınalǵandardyń ishinen birqatar adamdar ózderin agresıalyq túrde ustap,tyıym salynǵan "DVK" ekstremıstik uıymynyń urandaryn aıqaılap aıtyp, qoǵamdyq tártipti buzdy.Osyǵan baılanysty ákimdikter men prokýratýra ókilderi beıbit mıtıńiler, jınalystar men sherýler ótkizý tártibi týraly zańnamanyń erejelerin túsindirdi.

Jekelegen azamattar zańsyz áreketterdi toqtatý týraly talaptarǵa baǵynbady. Sodan keıin polısıa kúshimen qoǵamdyq tártipti qalpyna keltirýge jáne tártip buzýshylardy ustaý sharalary qabyldandy.Nátıjesinde Elordada jáne Almatyda polısıa bólimderine 80 azamat jetkizildi. Olardyń áreketterine zańda belgilengen tártippen quqyqtyq baǵa beriletin bolady.

İshki ister mınıstrligi azamattarǵa arandatýshylyqqa berilmeýge jáne Qazaqstan Respýblıkasynyń zańnama talaptaryn saqtaýǵa shaqyrady.