Tólesovanyń sózinshe, olardy bosatý týraly sheshimdi túrme ákimshiligi 5 mamyrda júrgizilgen medısınalyq tekserýden soń qabyldaǵan.

— Beıbarystyń qan qysymy joǵary bolǵan eken. Meniń de densaýlyǵymnyń álsiregeni anyqtaldy. Munan soń túrme ákimshiligi bizdi bosatatyndaryn habarlady. Salmaq tastadym. Biraq qazir halim jaqsy, - dedi ol.

Tólesovanyń anasy Janar Jandosovanyń aıtýynsha, 5 mamyrda keshki saǵat 19.30-da Ásıa túrmeden telefon shalyp, ózderin bosatyp jatqanyn aıtqan. Eki belsendini úıge túrme qyzmetkerleri ákelgen.

— Ásıa men Beıbarysqa kesilgen 15 táýlik jaza merzimi 6 mamyrda 9.00-de aıaqtalýy kerek edi. Túrme ákimshiligi erteń jurt jınalady dep qoryqsa kerek. Ekeýi de sergek otyr, jaǵdaılary jaqsy, - dedi ol.

21 sáýirde Almatyda marafon kezinde "Shyndyqtan qashyp qutylmaısyń" degen jazýy bar banner ilgeni úshin eki belsendini - 34 jastaǵy Ásıa Tólesova men 20 jastaǵy Beıbarys Tolymbekovti sot 15 táýlikke qamaǵan edi.

Sáýir aıynyń aıaǵynda álemniń túkpir-túkpirinde oqyp jatqan Qazaqstan stýdentteri Chehıa, Fransıa, Ulybrıtanıa men Vengrıadaǵy Qazaqstan elshilikteri aldynda qamalǵan belsendilerdi qoldaý aksıasyn ótkizdi. Mundaı qoldaý sharalary Kanada, Italıada, Reseı, AQSH-da ótti.

Halyqaralyq quqyq qorǵaý uıymdary - Freedom House, Amnesty International jáne BUU-nyń Adam quqyǵy boıynsha Ortalyq Azıadaǵy keńsesi Qazaqstan bıligin Ásıa Tólesova men Beıbarys Tolymbekovti bosatýǵa shaqyrǵan.

Usynǵan: Ásel Bolatqyzy