Elimizde 2015-2018 aralyǵynda AQSH elshisiniń qyzmetin atqarǵan Djorj Kerol óz ornyn 57 jastaǵy Ýılám Mozerge bosatty.
Ýılám Mozer – Amerıkanyń syrtqy saıasat salasynda joǵary jetistikterge jetken kórnekti qyzmetker. Mozer 1984 jyldan bergi dıplomatıalyq qyzmeti barysynda Ýkraına, Qazaqstan, Egıpet, Sýrınam jáne Malı elderinde jumys jasady.
2015 – 2017 jyldary sheteldegi dıplomatıalyq ókildikterdiń ǵımarattaryn paıdalaný jónindegi búro dırektorynyń birinshi orynbasary jáne 2006 jyldan 2011 jylǵa deıin AQSH Memlekettik hatshysynyń materıaldyq-tehnıkalyq qamtamasyz etýdi basqarý jónindegi kómekshisiniń orynbasary qyzmetterin atqardy.
Ol Vashıngton qalasynda AQSH Memlekettik departamentiniń jahandyq qoldaý kórsetý men ınovasıalyq máseleler jónindegi dırektory, Eýropa jáne Eýrazıa isteri jónindegi atqarýshy dırektordyń orynbasary, Taıaý Shyǵys jáne Ońtústik Azıa isteri jónindegi búronyń Dıplomatıalyq ókildikterdi basqarý bóliminiń basshysy, Saıası-áskerı máseleler jónindegi búronyń saıası-áskerı máseleler boıynsha keńesshisi laýazymdaryn atqarǵan.
Jańa elshiniń qoıylýymen Qazaqstanda amerıkalyq dıplomattar sany kóbeıe bastady. Qazaqstandyq jýrnalıs İbrash Núsipbaevtyń aıtýynsha, Aq úı bul qadammen Orta Azıa jáne Qazaqstan azamattaryna nazar aýdartý úshin nasıhattyq aqparattyq jeli salatynyna senimdi.
Mozerdiń bul Qazaqstanǵa ekinshi ret kelýi: ol mansabynyń birshama merzimin elimizde AQSH-qa qarasty elshiliktiń energetıka jáne ekonomıka máselesi boıynsha attashe bolyp qyzmet etken.
Ol qarapaıym amerıkalyq saıasattyń ısteblıshment ókili... 2013 jyly Moldovada elshi bolǵan kezde LGBT-ujymdaryn qoldap, tipti Kıshenevtegi ótken alǵashqy geı-sherýge qatysqan. Ol Ýkraınadaǵy qozǵalysty "qarapaıym halyqtyń naǵyz demokratıaǵa umtylýy" dep esepteıdi.
"Tústi revolúsıalar maıtalmany" degen laqap aty bar jańa elshige AQSH-tyń memlekettik departamenti Ortalyq Azıaǵa "demokratıa ákelý" maqsatynda 500 mıllıon dollar bóldi degen qaýeset tarady. Al endi suraq! Elimizde prezıdent tańdaýlary aldynda AQSH-tyń bizdiń ishki saıasatyna aralaspaýyna kim kepil?
Avtor: Ildar Adılchenov
