2019 jyldan bastap kóptegen elderde týrıser jańa shekteýler men qatań ári qyzyqty zańdarǵa tap kelýi múmkin. Tártipke baǵynbaǵandarǵa joǵary mólsherde aıyppul salýdan bastalyp, ólim jazasyna kesýge deıingi qatań jazalaý túrleri bekitilgen elder de joq emes. Qamshy.kz aqparat agenttigi álem elderindegi osyndaı qyzyqty zańdardyń birqataryn nazarlaryńyzǵa usynady.
Mysaly, Italıalyń Kaprı aralynda 1-mamyrdan bastap plasıkalyq ydystardyń barlyq túrin qoldanýǵa tyıym salyndy. Tártip buzýshylar 500 eýro kóleminde aıyppul tóleýge tıis. Demalys maýsymynyń naǵyz qyzǵan shaǵynda aralǵa kúnine 20 myńnan astam týrıs kelip, sońdarynan óte kóp mólsherde plasık qaldyqtaryn qaldyrady. Osy jaılardy eskere otyryp Kaprı De Martıno qalasynyń meri jańa tártip engizý týraly sheshim shyǵarǵan.
Al Fransıa astanasy Parıjde qyrkúıek aıynan bastap jaıaý júrginshiler joly men trotýarlarda elektrli skýtermen, mopedtermen júrseńiz 135 eýro aıyppul tóleýge tıissiz.
Taılandtaǵy Phýket aralynda ornalasqan Maı Khao jaǵajaıynda ushyp bara jatqan nemese áýejaıǵa qonyp jatqan ushaqtardy sýretke túsirýge jáne olarmen selfı jasaýǵa tyıym salynbaq. Sebebi, demalys orny áýejaıǵa tym jaqyn ornasqan. Al jaqyn qashyqtyqtan fotoǵa túsirý ushaqtardyń basqarý júıesine kedergi keltirýi múmkin. Tyıym salynǵan aýmaqta sýretke túsýshilerge úlken kólemdegi aıyppuldan bastap abaqtyǵa jabý, tipti, ólim jazasyna deıingi jazalar qarastyrylǵan. Jergilikti bıliktiń aıtýynsha, eń aýyr jaza túri ushaqtardyń basqarý júıesine kedergi keltirgen tártip buzýshylarǵa qoldanylady.
Italıanyń Chınkve-Terre ulttyq saıabaǵynda saıahatshylar úshin jeńil kıilip-sheshiletin aıaq kıimderdi kıýge tyıym salynady. Taýly aımaqtyń jer bederine sáıkes kelmeıtin aıaq kıim kıgen týrıser únemi keleńsiz jaǵdaılarǵa urynady da, qutqarýshylar tobyn shaqyrýǵa májbúr bolady. Endi jańa tártip boıynsha, tyıym salynǵan aıaq kıim kıgenderge 50 eýro aıyppul salynady, al qutqarý qyzmetiniń quny 2 500 eýroǵa deıin qymbattaıdy.
Qamshy.kz aqparat agenttigi óz oqyrmandaryna demalysty josparlaǵan sátten bastap-aq, saparlap barǵaly jatqan elińizdiń zańdary men ishki tártipteri týraly tolyq aqparat alýǵa keńes beredi. Bul demalysyńyzdyń joǵary deńgeıde ótip, jaqsy áser qaldyrýyna óz septigin tıgizedi. "Tártipke baǵynǵan qul bolmaıtynyn" da eskere júrgeısiz!
