IBNS – Halyqaralyq banknot qaýymdastyǵy. Bul uıym jyl saıyn álemdegi eń ádemi banknottar tizimin jasaıdy. Qamshy.kz aqparat agenttigi osy uıym bergen aqparattar negizinde álemdegi eń ádemi degen banknottar bestigin nazarlaryńyzǵa usynǵymyz keledi.
Besinshi oryn – Solomon araldarynyń 40 dollarlyq kýpúrosy
Solomon araldary Tynyq muhıtynyń ońtústik-batys bóliginde ornalasqandyqtan, aqsha betinde muhıt sýretteriniń bederlenýi qalypty jaıt. Kýpúronyń aldyńǵy jaǵynda – teńiz sýreti, artqy jaǵynda – balalar otyrǵan keme men eskek ustaǵan adam mingen eki keme beınelengen. Sonymen qatar, banknot betinen súńgýir qaıyqty, balyqtar men tasbaqany da kórýge bolady.
Tórtinshi oryn – 100 Reseı rýbli
Bul kýpúra 2018 jyly ótken fýtboldan Álem chempıonatynyń qurmetine jaryq kórgen. Aldyńǵy betinde fýtbol dobyn ustaǵan bala men ańyzǵa aınalǵan qaqpashy Lev Iashın beınelense, artqy jaǵynda – jer sharyna uqsas fýtbol dobynyń sýreti salynǵan.
Úshinshi oryn – 500 Norvegıa krony
Bul banknottyń sánin norvegıalyq áıgili keme jasaýshy Kolın Archerdiń qutqarýshy kemesi keltirip tur. Dál osy Archerdiń kemesimen ataqty ǵalym Frıtof Nansen Soltústik polústi baǵyndyrǵan, al saıahatshy Rýal Amýdsen Ońtústik polúske barý josparyn sátti aıaqtaǵan.
Ekinshi oryn – 200 Shveısarıa franky
Bul valúta betindegi beıne basqalaryna qaraǵanda óte erekshe. Úsh koordınat osin nusqap turǵan úsh saýsaq. Bul Shveısarıa ǵylymynyń damyǵandyǵynan kórinis beredi. Aqshanyń jalǵan kóshirmesi jasalmaýyn qadaǵalaý úshin qarjy betine 15 túrli erekshelikter engizilgen.
Birinshi oryn – 10 Kanada dollary
2018 jyldyń eń ádemi banknoty ataǵyna Kanadanyń 10 dollary ıe boldy. Banknot betinde Kanadadaǵy násildik segregasıamen kúreste úlken eńbek sińirgen qara násildi kásipker Vıola Desmond hanymnyń portreti beınelengen. Al kelesi betinde 2014 jyly ashylǵan Adam quqyqtary jónindegi Kanada murajaıy ǵımaratynyń sýretin kórýge bolady.
