Almaty qalasynda óz áriptesin óltirgen polıseı sotta sońǵy sózin aıtty dep jazady Qamshy.kz aqparat agenttigi ktk.kz saıtynyń deregin negizge alyp. Azamat Baristemov áriptesiniń týystarynan ómir boıy keshirim surap ótetinin jetkizdi. Sonymen qatar, Azamat óziniń áriptesin óltiremin degen oı múldem bolmaǵanyn aıtty. 

"Tamyzdyń sońǵy kúnderi edi. Ákeme eskertkish qoıý kerek boldy. Qyrkúıek aıy tergeý jumystary men eńbek demalysynyń aıaqtalatyn kezi bolatyn. 25 qyrkúıekte ákeme jala jabylyp, alǵashqy sot otyrysy ótti. Sondaı-aq tergeý jumystary bastaldy. 26 qyrkúıekte meniń eńbek demalysym aıaqtalyp, jumysqa shyqtym. Men sol kúni neni oıladym deseńizshi, sot myrza?! Meniń ómirlik josparlarym men maqsattarym múldem basqasha bolatyn. Alaıda men qasaqana óltirý týraly sóz qozǵap turǵanym joq. Meniń jaqsy kóretin áıelim, ulym, anam men týystarym bar. Sondaı-aq ákeme degen maqtanysh sezim bar. Eger mende qaıtys bolǵan áriptesimdikindeı bedel bolatyn bolsa, onyń sol kúngi áreketin qaıtalamas edim", - dedi Azamat Baristemov. 

Ol óz kinásin tolyq moıyndady.  Atalǵan is boıynsha sot sheshimi búgin shyǵady. Marqum Sábıt Beglanulynyń týystary ony barynsha uzaq merzimge qamaýdy surady. 

Esterińizge sala ketsek, 26 qyrkúıekte almatylyq polıseı áriptesine oq atqan edi. Beristemov sol kúni kezekshilikke túsip, kúıeý balasyn kórip qalyp, onymen sóılespek bolady. Ony adam joq jerge baryp, qarýdy basyna taqap qorqytady. Áriptesi tómen eńkeıgende, "ol da qarýdy taqaımyn" dep atyp alady. Áriptesi aýrýhanaǵa jetkizilip, keıin jansaqtaý bóliminde qaza boldy. Keıinnen Azamattyń mundaı qadamǵa barýyna qaryndasy sebep bolǵany anyqtaldy. Qaıtys bolǵan Sábıt Beglanuly Azamattyń qaryndasyna úılengen. Azamattyń qaryndasy kúıeýiniń birneshe aıdan beri úıge qonbaıtynyn aıtyp, aǵasyna aryzdanǵan. Keıin Azamat óziniń kúıeý balasymen jeke sóılespek bolady.

Aýdarǵan: Ásel Bolatqyzy