Aqtaýda kóshe tazalyqshylary men komýnaldyq arnaıy tehnıkalardyń júrgizýshileri jumysqa shyqpaı qoıdy. «Qala joldary» komýnaldyq  memlekettik kásipornynyń jumysshylary sáýir aıyndaǵy jalaqylaryn tóleýdi talap etti, dep habarlaıdy Qamshy.kz aqparat agenttigi lada.kz saıtyna silteme jasap.

Oblys ortalyǵynda 400-ge jýyq jumysshy qala kóshesin tazalaýdan bas tartqan. Aqtaý qalasynyń ákimdigi  jumysshylar jalaqysynyń keshiktirilýin búdjetke túsetin salyq túsiminiń nasharlaýymen baılanystyryp otyr.

Al narazylyq bildirgen jumysshylar sońǵy alty aıda  óz aqshalaryn daý-janjalmen alyp júrgenderin aıtty.

«Biz ylǵı «aılyq qashan túsedi» dep aıqaı kóterip, óz jalaqymyzdy talap etemiz. Olar ár kúni "erteń"dep ýáde etedi. Jalaqymyzdy tóleý úshin dırektor tipti nesıe aldy» - dep shaǵymdandy Aınash Idıbaeva.

Jumysshylardyń aıtýynsha, sypyrǵysh, qolǵap sıaqty kúndelikti jumysqa qajetti zattardy da ózderi satyp alýǵa májbúr eken.

«Bizge qaıta-qaıta ýáde berip, aqyr aıaǵy jalaqymyz 10 kún, 15 nemese 20  kún keshiktiriledi. Al bizdiń barlyǵymyzda nesıe bar, keıbirimiz páter jaldap turamyz. Odan qalsa,árqaısymyzdyń úıimizde tamaq kútip otyrǵan bala-shaǵamyz bar ǵoı, olar kúte almaıdy emes pe?» - deıdi Naýryzbaı Ketebaev.

Al «Qala joldary» memlekettik komýnaldyq kásipornynyń dırektory Qaırat Haırýshevtiń aıtýynsha, ol bul jumysty burynǵy basshylyqtan birneshe mıllıon qaryzdarymen qabyldap alǵan.

«Men osy jerge kelgennen kásiporyndy saqtap qalýǵa kiristik. Maǵan deıin jasalǵan satyp alýdy tolyǵymen qarap shyqtym. Keıbir tehnıka men qural-jabdyqtar satyp alynyp, murajaıdyń eksponatyndaı paıdalanylmaı turǵan. Sondaı-aq, jalǵa alynǵan keıbir úı-jaılardyń baǵasy óte joǵary bolyp, qyzmetkerler shtaby bárin qaıta qarady. Osyndaı jumystardyń arqasynda, 421 mıllıon qaryzdy 170 mıllıon teńgege deıin qysqarttyq. Al jalaqy máselesi tek aqpanda bastaldy. Biraq men ol kezde jumysshylardyń jalaqysyn berý úshin nesıe aldym. Al qazir jalaqynyń ýaqytyly túspeýi Aqtaý búdjetinen qarjylandyrýdyń bolmaýyna baılanysty týyndap otyr» - dedi Qaırat Haırýshev. 

Óz kezeginde Aqtaýdyń shendileri bul máseleni joqqa shyǵarmady, alaıda qaı kezde naqty sheshimin tabatynyn da aıtpady. 

«Iá, «Qala joldary» kásipornyna qaryzymyz bar. Búgingi kúnge qaryz somasy 2,5 aıǵa 150 mıllıon teńgeni qurap otyr. Bul qaryzdy salyq túsimderi jetkilikti túskende tolyǵymen tóleımiz. Jumysshylarǵa qaryz ekenimizdi joqqa shyǵarmaımyz, olarǵa jaǵdaıdy túsindirýdemiz, biraq olar túsinýge tyryspaýda» - dedi Aqtaý qalasy ákiminiń orynbasary Jangeldi Áýbákirov.   

 Aýdarǵan: Mıat Káshibaı