19 mamyrda AQSH prezıdenti Donald Tramp Iranǵa soǵys ashpaýdy qatań eskertti dep jazady Qamshy.kz aqparat agenttigi Azattyq Radıosyna silteme jasap.

Bul týraly Tramp óziniń Twitter paraqshasyna "Iran soǵysqysy kelse, óz túbine ózi jetedi. Budan bylaı AQSH-qa qoqan-loqy kórsetýshi bolmańdar!" dep jazdy.

AQSH-tyń málimdeýinshe, Tegeran Parsy shyǵanaǵynda qaıyqtarǵa zymyrandaryn ornalastyryp, Birikken Arab Ámirlikteriniń jaǵalaýynda tórt kemeni atqylaǵan. Iran muny joqqa shyǵardy.

Mundaı jazba jarıalamastan birer kún buryn Tramp AQSH-tyń Iranǵa qysymy daýǵa ulasyp ketkenin qalamaıtynyn aıtqan. 16 mamyrda prezıdent "AQSH soǵysqa daıyndalyp jatyr ma?" degen jýrnalıser suraǵyna "Daıyndalyp jatqan joq dep úmittenemin" dep jaýap bergen. Tegeran da Iran bıliginiń "soǵysty qalamaıtynyn" aıtqan.

Eki apta buryn Vashıngton Parsy shyǵanaǵyna "Avraam Lınkoln" ushaq tasyǵyshyn qondyrǵan. AQSH Iranǵa qarsy 120 myń ásker jibergeli jatqany jaıly da habar tarady. Biraq Tramp muny joqqa shyǵaryp, "Sarbaz jiberý ázirge josparda joq, biraq qajet bolsa, munan kóp áskerı jiberemiz" degen. Artynsha Vashıngton AQSH-tyń Iraktaǵy elshiliginde isteıtin qyzmetkerleriniń basym bóligin Iran qaterinen soń qaýipsiz jerge evakýasıalady.

Vashıngton men Tegeran arasyndaǵy bul daý Iran ótken aptada 2015 jylǵy ıadrolyq kelisim talaptarynyń keıbirin oryndaýdan bas tartyp, ıadrolyq qarý daıyndaýǵa qajet baıytylǵan ýrandy qaıta óndire bastaıtynyn aıtqan soń týǵan. Iadrolyq kelisim aıasynda AQSH Iranǵa sanksıasyn azaıtyp, esesine Tegeran ıadrolyq baǵdarlamasynan bas tartýy kerek edi. Biraq Vashıngton "Iran talaptardy buzdy" dep byltyr bul kelisimnen shyǵyp ketti. Artynsha Tramp Tegeranǵa sanksıany qaıta kúsheıtti.

Usynǵan: Mıat Káshibaı