Jańadan saılanǵan Qazaqstan prezıdentin ulyqtaý rásimi daýys berý qorytyndysy jarıalanǵan kúnnen bastap bir aı ishinde ótkiziledi dep habarlaıdy Qamshy.kz aqparat agenttigi sputniknews.kz saıtyna silteme jasap.

Zań boıynsha Ortalyq saılaý komısıasy prezıdent saılaýynyń sońǵy qorytyndysyn daýys berý ótkennen keıin bir apta ishinde jarıalaýy tıis. Iaǵnı, 17-maýsymǵa deıin bıylǵy saılaýdyń naqty nátıjesi belgili bolady. Al jańadan saılanǵan prezıdentti ulyqtaý rásimi daýys berý qorytyndysy jarıalanǵan kúnnen bastap bir aı ishinde ótkizilýi kerek.

Bul degenimiz prezıdenttiń ınaýgýrasıasy 17-shildege deıin ótedi degen sóz. Ant berý kúnin Ortalyq saılaý komısıasy belgileıdi.

Aıta ketsek, Ortalyq saılaý komısıasynyń aldyn ala qorytyndysy boıynsha Qasym-Jomart Toqaev 70,76% daýys jınap, kezekten tys prezıdent saılaýynda jeńiske jetti.