Stambýl merin qaıta saılaý kezinde opozısıa kandıdaty Ekrem Imamoglý jeńdi dep habarlaıdy Qamshy.kz aqparat agenttigi Azattyq radıosyna silteme jasap.

Imamoglý Túrkıa prezıdenti Rejep Erdoǵan jetekshilik etetin "Ádildik jáne damý" partıasynyń úmitkeri Bınalı Iyldyrymnan alǵashqy saılaýdan da basym aıyrmamen - 9 paıyzben alǵa shyqty. Opozısıa lıderine saılaýshylardyń - 54 paıyzy, bılik partıasynyń ókiline 45 paıyzy daýys bergen. "Anadolý" agenttiginiń aqparatyna qaraǵanda, búletenderdiń 99,37 paıyzy sanalǵan.

23 maýsymda Stambýlda qala ákimin qaıta saılaý ótken. Ákimdikke 20 shaqty úmitker bar bolǵanymen negizgi tartys prezıdent Erdoǵan jetekshilik etetin partıa úmitkeri Bınalı Iyldyrym men opozısıalyq halyqtyq-respýblıkalyq partıasynyń kandıdaty Ekrem Imamoglý arasynda júrgen.

Bıyl naýryzda ótken saılaý qorytyndysy Erdoǵan jaqtastarynyń shaǵymynan soń "zańbuzýshylyqtar men burmalaý boldy" degen sebeppen jaramsyz dep tanylǵan edi. Túrkıa ortalyq saılaý komısıasy áýelde opozısıa kandıdaty Imamoglýnyń jeńisi zańdy boldy dep málimdegen. Alaıda artynsha nátıje joıylǵan soń qalada narazylyq aksıalary ótti.

Erdoǵan da, Iyldyrym da jeńilisti moıyndap, opozısıa kandıdatyn quttyqtady.