Túrkistan oblysynyń ákimi Ómirzaq Shókeev brıfıń barysynda Arys qalasyndaǵy jarylys saldarynan bir adam qaza tapqanyn aıtty dep habarlaıdy Qamshy.kz aqparat agenttigi tengrinews.kz saıtyna silteme jasap.

"Arys qalasyndaǵy jarylys saldarynan zardap shekkender sany - 31. Onyń ekeýi aýyr halde jatyr. Bir adam qaza tapty. Snarád onyń kóligine túsken", - dedi oblys ákimi. 

Arysta oryn alǵan apattan 23 adam ártúrli dene jaraqattarmen Túrkistan oblysyna qarasty aýrýhanalarǵa jetkizilgeni habarlandy. 

Olardyń basym bóligi Oblystyq klınıkalyq aýrýhanada jatyr. Olarǵa barlyq qajetti medısınalyq kómek kórsetilip jatyr.

Osyǵan deıin, Arystaǵy tótenshe jaǵdaıǵa oraı Ordabasy aýdanynda medısınalyq shtab qurylǵany habarlandy.

"Túrkistan oblysy densaýlyq saqtaý basqarmasynyń basshysy Muqan Egizbaevtyń basqarýymen shuǵyl jumystar júrgizilip jatyr. Ordabasy aýdandyq ortalyq aýrýhanasynan jáne Oblystyq klınıkalyq aýrýhanasynda 200-den asa naýqasqa arnalǵan oryn daıyndaldy. 30 jedel járdem kólikterin Shymkent qalasyna kirer 3 jolǵa qoıyldy. Taǵy da qajet bolǵan jaǵdaıda birneshe aýdandardan aldyrylǵan qosymsha jedel járdem kólikteri daıyn", - delingen habarlamada. 

Arystaǵy jarylys: 34 adam dárigerdiń kómegine júgindi Oblystyq klınıkalyq aýrýhanadan travmatolog, hırýrg, reanımatolog dárigerler qurylǵan medısınalyq shtabqa jınaldy. Qazirgi kezde jaraqat alǵandar joq. Evakýasıa jumystary júrgizilip jatyr. Arys qalalyq ortalyq aýrýhanasy men emhanasynan naýqastar evakýasıa jasaldy. Mamandar da jedel járdem kólikteri de oblys boıynsha jetkilikti.