Halyqqa qyzmet kórsetý ortalyqtaryndaǵy uzyn-sonar kezektiń sebebi belgili boldy dep habarlaıdy Qamshy.kz aqparat agenttigi KTK telearnasyna silteme jasap.

İshki ister mınıstrligi kólikterdi rásimdeý men júrgizýshi kýáligin berýdi ortalyqtan baqylaý úshin 1 shildeden bastap veb-modýl engizgen bolatyn. Alaıda otandyq kompanıa óndirgen kompúterlik baǵdarlamada aqaý ketip, aptap ystyqta jurt mamandandyrylǵan qyzmet kórsetý ortalyǵynda seńdeı soǵylysyp júr.

1 shildeden bastap kezekti reformany qolǵa alǵan İshki ister mınıstrligi jańashyldyqqa daıyn bolmaı shyqty. Sońǵy eki táýlikte elimizdiń túpkir-túpkirindegi kólik júrgizýshileri halyqqa qyzmet kórsetý ortalyqtarynda sabylyp júr. Mamandar tıisti qujatty qabyldaǵanymen jaýapty vedomostvanyń aqparattyq bazasy baıaý jumys isteýde. Kóligin tirketip nemese júrgizýshi kýáligin aýystyrýǵa kelgen jurt saǵattap kezekte turýǵa májbúr, dep habarlady 

Almatydaǵy mamandandyrylǵan halyqqa qyzmet kórsetý ortalyǵynda adam nópiri kóp. Zalda da, syrtta da otyratyn joq. Bar sharýasyn keıinge ysyryp, ortalyqty toraýyldap júrgenderdiń barlyǵy – kólik júrgizýshileri. Báriniń taǵaty taýsylsa da qas-qaraıǵansha júrýge daıyn.

"Kóligimdi satyp edim. Qujattaryn rásimdeı almaı jatyrmyn. Ne aıtpaıdy, ne bermeıdi. Eldi jınap qoıyp otyr", - deıdi Almaty qalasynyń turǵyny Asqar Óskenbaev.

Al taǵy bir qala turǵyny Ermek Áldekov júrgizýshi kýáligin aýystyrýǵa kelgen.

"Tańǵy saǵat 7-den beri turmyz", - dep shaǵymdandy ol.

Kesheden bastap İshki ister mınıstrligi júrgizýshi kýáligin beretin tirkeý-emtıhan bólimindegi qyzmetin halyqqa qyzmet kórsetý ortalyqtaryndaǵy mamandarǵa ótkizdi. Iaǵnı aldaǵy ýaqytta "Azamattarǵa arnalǵan úkimet" memlekettik korporasıasynyń mamandary júrgizýshi kýáligin alýshylardan teorıalyq jáne tájirıbelik emtıhandardy qabyldaıdy degen sóz. Alaıda, kólikti tirkeý men júrgizýshi kýáligin berý isi İshki ister mınıstrliginiń quzyrynda qalady.

"Emtıhan, tirkeý bólimderi bólek jumys isteıdi. Iaǵnı elektrondy túrde. Beg ofıs pen front-ofıs arasynda alshaq qyzmet kórsetemiz. Osyǵan oraı aqparattyq qyzmet kórsetý júıesi baıaý istep jatyr. Biraq birte-birte qalpyna kelip jatyr, - dep túsindirdi Almaty qalasy mamandandyrylǵan halyqqa qyzmet kórsetý ortalyǵynyń basshysy Sáken Baıǵalıev.

Osylaısha qashyqtyqtan basqarylatyn sharýa Almatyny ǵana emes, elimizdiń ár túkpirindegi júrgizýshilerdi ábirgerge salýda. Derekter bazasyndaǵy aqaý óskemendikterdiń de tózimin taýysty. Talon berilmegendikten turǵyndar paraqqa aty-jónderin jazyp tizim qurǵan. Alaıda onyń jyljıtyn túri joq.

"Kesheden beri osyndamyz. 200 adam jazyldy. Qolymdaǵy tizimge qarańyz. Jaýaptylar bolsa qajetti baǵdarlamany búgin ornatyp júr. Nege aldyn-ala daıyndalmaıdy? Kún ystyqta ábigerge tústik", - deıdi Óskemen qalasynyń turǵyny Sáýle Sháripova.

Júrgizýshi kýáligin berý men kólik quraldaryn tirkeýge polısıany múldem aralastyrmaı, jemqorlyqty joıýǵa kirisken mınıstrlik bolǵan keleńsizdikti jaqyn arada joıamyz dep sendirip otyr.