Qarjy mınıstri Álıhan Smaıylov 4 shildede ótken senat otyrysynda jarylystan búlingen Arys qalasyn qalpyna keltirý úshin 34,4 mıllıard teńge qajet ekenin aıtty dep jazady Qamshy.kz aqparat agenttigi Azattyq Radıosyna silteme jasap.

"Arys turǵyndaryna 100 myń teńge kóleminde aqshalaı ótemaqy berý úshin 4,5 mıllıard teńge kerek. Úkimet rezervinen - 2,5 mılııard teńge, Túrkistan oblystyq búdjetinen - 1 mıllıard teńge jáne qaıyrymdylyq kómek esebinen 1,5 mıllıard teńge bólinedi", - dedi Smaıylov.

Mınıstrdiń aıtýynsha, Arystaǵy 7 700-den astam turǵyn úıdi jóndeýge 19,2 mıllıard teńge ketedi. Qajet qarajattyń jartysy túrli óńirlerdiń búdjet esebinen alynady, qalǵan aqsha úkimet rezervinen bólinedi.

"66 áleýmettik nysandy qalpyna keltirýge 7 mıllıard teńge kerek. Bul - 54 bilim berý, 8 densaýlyq saqtaý, 4 sport obektileri. 6 mıllıard teńgeni "Samuryq-Qazyna" bóledi. 1 mıllıard teńge bıznes qaýymynan keledi", - dedi mınıstr.

Onyń aıtýynsha, qaladaǵy elektr jelileri men jylý júıelerin, ınfraqurylymdy jóndeý úshin úkimet rezervinen 2,2 mıllıard teńge bólinbek. Bárin qosqanda Úkimet rezervinen 15,5 mıllıard, jergilikti búdjetten 10,6 mıllıard, "Samuryq-Qazyna" qorynan 6 mıllıard,  demeýshiler men gýmanıtarlyq kómekten 2,5 mıllıard teńge qalany qalpyna keltirý úshin alynady.