Shyǵys Qazaqstannyń iri kásiporyndary men turǵyndary Arys qalasyna kómek retinde 166 mıllıon teńgeden astam qarajat jınady dep habarlaıdy Qamshy.kz aqparat agenttigi.  

Buǵan qosa 211 tonnadan astam gýmanıtarlyq kómek Ońtústiktegi apattan zardap shekken aǵaıyndarǵa jóneltýge daıyn. Onyń basym bóligi azyq-túlik, sonymen qosa gıgıenalyq zattar, tósek-oryn jabdyqtary men kıim-keshek. 

– Gýmanıtarlyq kómek jınaý «Nur Otan» partıasy oblystyq fılıalynyń baqylaýynda boldy. Óńirdegi ár kásiporyn kómek kórsetýge tyrysty. Qol ushyn sozýǵa eńbek ujymdary, Dostyq úıleri men etnomádenı birlestikter, jastar uıymdary, Azamattyq Aláns bári de bir kisideı atsalysty, – dedi Danıal Ahmetov. 

Sondaı-aq iri saýda ortalyqtarynda «Qaıyrymdylyq sóreleri» uıymdastyrylyp, turǵyndar shama-sharqynsha azyq-túlik pen gıgıenalyq zattardy jınasa, Kúrshim aýdanynda ótken respýblıkalyq «Jaıdarman» jastar festıvalinen túsken qarjy da arnaıy shotqa salynyp, Arysqa jiberildi.  

İzgi isten aýdandar da qalys qalmady. Zaısan aýdany 40 tonnaǵa jýyq un jiberse, glýbokoelik kásipkerler bir tonnadaı kúnbaǵys maıyn jınap berdi. 

Aıta keteıik, Arystaǵy apatqa baılanysty oblysymyzdyń aýdan ortalyqtary men qalalarynda zardap shekkenderge gýmanıtarlyq kómek kórsetý maqsatynda 20-ǵa jýyq kómek qabyldaý pýnkti ashylǵan bolatyn.