Qytaıda bilim alǵan qazaqstandyq stýdent turǵyn úıdiń 17-shi qabatynan qulaǵan dep jazady Qamshy.kz aqparat agenttigi sputniknews.kz saıtynyń deregin negizge alyp. 

Qytaı polısıasy qazaqstandyq Sandıra Serikhanovanyń ólimine qatysty isti qaıta qarap, qyzdyń jazataıym oqıǵa saldarynan kóz jumǵanyn rastady. 

24 jastaǵy qyz Qytaıdyń Chanchjoý qalasynda turǵyn úıdiń 17-shi qabatynan qulap kóz jumǵan. Qaıǵyly oqıǵa osy jyldyń 26 sáýirinde bolypty. Sandıra Serikhanova Qytaıdyń Szánsý provınsıasyndaǵy tehnologıa ýnıversıtetinde oqyp júrgen.

Qyzdyń ákesi men aǵasy dereý Chanchjoý qalasyna attanǵan. Qazaqstannyń Shanhaıdaǵy bas konsýldyǵynyń kómegimen marqumnyń otbasy Qoǵamdyq qaýipsizdik departamenti, Serikhanova oqyǵan ýnıversıtet pen saqtandyrý kompanıasynyń ókilderimen kezdesti. Kezdesý kezinde qyzdyń týǵan-týystaryna qaıǵyly oqıǵa bolǵan úıdiń kireberisindegi kameralardyń  beınematerıaldary kórsetildi.

Tergeý qorytyndysyna sáıkes, qazaqstandyq qyzdyń jazataıym oqıǵa saldarynan qaza bolǵany anyqtaldy. Kisi qolynan kóz jumǵany rastalǵan joq.

2 mamyrda marqumnyń denesi Beıjińnen Nur-Sultan qalasyna jetkizildi.