Jer daýy bul kúnderi qaıtadan jıi talqylanatyn taqyryptardyń biri bolyp barady. Kúni keshe premer-mınıstriniń orynbasary Jeńis Qasymbek jer máselesindegi moratorıı jarıalanǵan baptardy qaraý Ulttyq qoǵamdyq senim keńesine tapsyrylatynyn málim etti. Al áleýmettik jelide "jer sheteldikterge jalǵa beriledi, satylady-mys" degen áńgimeler jeldeı esýde. Sonyń birin "Alash joly" jalpyhalyqtyq qozǵalysynyń jetekshisi Maqsat İlıasuly óziniń feısbýktaǵy paraqshasynda jazyp júr. Osy oraıda "Qamshy" tilshisi Maqsat İlıasulymen habarlasyp, mán-jaıdy suraǵan bolatyn.

– Feısbýktaǵy "Sheteldik ınvestorlarǵa jer jalǵa da, jeke menshikke de berilýi múmkin" degen jazbańyz qyzý talqylanýda. Bul málimdemelerińizdiń qandaıda bir zańdyq negizi bar ma?

– Munyń kem degende eki zańdyq negizi bar. Jerdi sheteldikterge jalǵa berýdi, jekemenshikke satýdy kózdeıtin daýly 23-bap jer kodeksinen áli kúnge deıin alynyp tastalǵan joq. Bul birinshisi. Al ekinshisi – ınvestısıalyq jobalarǵa jer konkýrssyz beriledi degen arnaıy ereje.

– Siz aıtqan daýly baptarǵa moratorıı jarıalanǵan. Prezıdent onyń merzimi bitetin 2021 jyldyń jeltoqsanyna deıin túpkilikti sheshim qabyldanatynyn, jer sheteldikterge satylmaıtynyn aıtty. Buǵan ne deısiz?

– Úkimettiń jýyrdaǵy birlesken otyrysynda Toqaevtyń aıtqan bul sózderin bári estidi. Dese de oǵan deıin áli ýaqyt bar. Bıliktiń nendeı qýlyq oılap tabatynyn boljap bolmaısyń. Jer máselesimen shuǵyldanyp júrgen Muhtar Taıjan da bıliktiń aıtqanyn qaıtalap júr. Zań qabyldanǵanǵa deıin olardyń eshqaısysyna senýge bolmaıdy.

– Al arnaıy ereje dep otyrǵanyńyz qandaı ereje?

– Ol joǵaryda aıtqanymdaı, ınvestısıalyq jobalarǵa jerdi konkýrssyz berýdi kózdeıdi. Úkimet jýyrda prezıdentten "Kazakh invest" Ulttyq kompanıasymen birlesip aldaǵy 3 jyldyń ishinde agroónerkásip keshenine iri sheteldik korporasıalardy tartý týraly tapsyrma aldy. İzinshe, Aýyl sharýashylyǵy mınıstrligi "Kazakh invest" UK-men kezdesý ótkizip, ınvestısıalyq jobalardy tartý máselesin talqylady. Almaty oblysynyń ınvestısıalyq portalyna (http://invest.alm-reg.kz/kz/Investoru/Zerd_alu/) kirseńiz jer ýchaskelerin bólýdiń erejesi táptishtep jazylǵan. Onda bylaı deıdi:

"Jer ýchaskelerin alý jáne ınvestısıalyq jobalardy iske asyrý barysynda jer qoınaýyn paıdalaný quqyǵyn aımaqtyq dárejede alý maqsatynda memlekettik kómek túrlerin alý úshin óńirlik úılestirý keńesiniń (ary qaraı ÓÚK) sheshimi negizinde jobany ınvestısıalyq dep taný kerek.

Bul jaǵdaıda ÓÚK-niń oń sheshimi berilse, ınvestısıalyq jobaǵa jer ýchaskesin bólý baıqaýǵa qatyspaı-aq tikeleı kelisim arqyly júrgiziletinin atap ótken jón".

"Alash joly" jalpyhalyqtyq qozǵalysynyń jetekshisi Maqsat İlıasulymen suhbat osylaı órbidi. Áńgime barysynda aıtylǵan Almaty oblysynyń ınvestısıalyq portalyndaǵy derekter anyqtalyp, qosymsha habarlanady.