Atyraýdaǵy "jer daýy" boıynsha sottalǵan qoǵam belsendi Talǵat Aıandy 19 shildede №2 Atyraý qalalyq soty merziminen buryn bosatty dep habarlaıdy Qamshy.kz aqparat agenttigi Aq Jaıyq basylymyna silteme jasap.

"Osydan bir jyl buryn olar meniń bas bostandyǵymdy shekteý jazasyn sharttyǵa ózgertip, ony 2021 jylǵa deıin sozdy. Bas bostandyǵyńnyń shektelýi ne ekenin túsinsin degen sekildi. Bylaı qarap tursańyz, bostandyqtasyz, úıdesiz ǵoı, biraq eshqaıda bara almaısyz, ruqsatsyz áreket qyla almaısyz, bos ýaqytyńyz da shekteledi. Ár apta saıyn probasıa organdaryna baryp, tóbe kórsetip turýyńyz kerek, keshki ýaqytta eshqandaı eskertýsiz polısıa qyzmetkerleri úıge saý ete túse alady. Sondyqtan qas qaraıa "Kúlsheqyz" qusap úıińizge tura júgiresiń. Kóńil kóteretin keshterge bara almaısyz, mysaly toıǵa barýǵa quqyń joq. Basqa jerge, mysaly qazaǵa barý kerek bolsa, onda da ruqsat alýyń kerek. JSN-niń de buǵattalǵan, óıtkeni aty-jónińiz lańkestikti qarjylandyrýmen aınalysatyn adamdardyń tiziminde tur, bir sózben aıtqanda bul eshbir jumys orny jumysqa almaıtyn tańba", - dep jazdy Talǵat óziniń Facebook-tegi paraqshasynda.

Talǵat Aıannyń aıtýynsha, sotqa qatysqan prokýror men probasıa qyzmeti bul sheshimge qarsy bolǵan, biraq sot ony merziminen buryn bosatý týraly ótinishin qanaǵattandyrǵan. Alaıda qoǵamdyq qyzmetke tyıym salý kúshinde qalady. Eske salaıyq, byltyr 28 sáýirinde Talǵat Aıan Aqtóbe túzeý kolonıasynan bosatylyp, jazanyń ótelmegen bóligin (bas bostandyǵynan aıyrý túrinde) úsh jylǵa bas bostandyǵynan shekteýge aýystyrdy.

Talǵat Aıannyń serigi Maks Boqaev óziniń besjyldyq qamaý merzimin Aqtóbede, KA-168/2 orta rejımdegi kolonıada óteýin jalǵastyryp jatyr.