Kezdesýde Qazaqstannyń Tuńǵysh Prezıdentine partıany jańǵyrtý josparyn júzege asyrý barysy, sondaı-aq «Nur Otan» partıasynyń Túrkistan oblysy Arys qalasyn qalpyna keltirý jumystaryna atsalysýy týraly baıandaldy dep habarlaıdy Qamshy.kz aqparat agenttigi Elbasy.kz saıtyna silteme jasap.

– «Nur Otan» – elimizdegi basty saıası kúsh. Partıa halyqqa jaqyn bolyp, onyń muń-muqtajyn bilýge jáne oǵan qoldaý bildirýge tıis. Qoǵamda týyndaıtyn máselelerdi sheshýge kómektesý kerek. Sondaı-aq, partıamyzdyń kadrlyq quramyn muqıat zertteý qajet. «Nur Otan» óz jumysyn odan ári jetildirýdi jalǵastyra berýge tıis, – dedi Nursultan Nazarbaev.

Elbasy «Nur Otan» partıasynyń óńirlerdegi fılıaldary men bastaýysh partıa uıymdarynyń jumysyn jandandyrýdyń mańyzdylyǵyn atap ótti.

– Bastaýysh partıa uıymdarynyń jetekshilerimen, Saıası keńes múshelerimen, partıanyń óńirlerdegi fılıaldarynyń basshylarymen kezdesý josparlanǵan. Uıymnyń barlyq býynynyń oıdaǵydaı jumys isteýin qamtamasyz etýdiń mańyzy zor. Sondaı-aq, partıanyń Májilistegi jáne máslıhattardaǵy fraksıalary tarapynan Úkimet pen ákimderdiń jumysyn baqylaýdy barynsha kúsheıtý qajet, – dedi Qazaqstannyń Tuńǵysh Prezıdenti.

Nursultan Nazarbaev partıalyq baqylaý komısıalarynyń jáne ortalyq pen jergilikti jerlerdegi sybaılas jemqorlyqqa qarsy is-qımyl keńesteriniń jumysyn jaqsartý máselesine toqtaldy. Halyqpen «keri baılanys» ornatý quraldarynyń tıimdiligin arttyrý, sonyń ishinde partıanyń qoǵamdyq qabyldaý oryndarynyń qyzmetin jaqsartý máselelerine de nazar aýdaryldy.

Kezdesý sońynda Elbasy Partıany qaıta jandandyrý baǵdarlamasyn ázirleýdi jáne ony «Nur Otan» partıasynyń Saıası keńesi búrosynyń qaraýyna shyǵarýdy tapsyrdy.