Sibirdegi orman órtin sóndirýdiń qajeti joq. Krasnoıar ólkesiniń gýbernatory Aleksandr Ýsstyń bul málimdemesi ekologtardyń yzasyn keltirdi dep habarlaıdy Qamshy.kz aqparat agenttigi "Habar 24" silteme jasap.

Oǵan jaýap retinde qorshaǵan ortany qorǵaýshylar arnaıy baspasóz máslıhatyn ótkizdi. Olardyń aıtýynsha, órt oshaǵyn der kezinde anyqtap, tıisti shara qoldanǵanda orasan shyǵyn ákelgen tabıǵı apattyń aldyn alýǵa bolar edi. Endi órttiń saldary aýyr bolatynyn aıtyp, ekologtar dabyl qaǵýda.

"3,5 mıllıon gektar aýmaǵyndaǵy bıotirshilik joıyldy. Bul neni bildiredi? Sol ormandy mekendeıtin ań-qus qyrylyp qaldy. Jóke aǵashtary, balqaraǵaı syndy flora men faýnany joǵalttyq. Mundaı ekologıalyq shyǵynnyń mólsheri órtti sóndirýge ketetin aqshadan asyp túsedi. Tipti, otty zámzám sýmen óshirgen kúnniń ózinde, osynshalyq shyǵynnyń aldyn alýǵa bolar edi", - dedi Jalpyreseılik tabıǵat ınstıtýtynyń dırektory Andreı Peshkov.

Esterińizge salsaq, alapat órt Krasnoıardan bólek, Irkýtsk jáne Býrátıanyń bir bóligin sharpyǵan. Búginde ormandy alqaptyń 3 jarym mıllıon gektary kúlge aınaldy. Al, onyń tútini Tomsk, Novosibir, Kemer, Altaı, Hakasıa men Qazaqstannyń keı aımaǵyna tarap úlgergen. Óńirdegi densaýlyq saqtaý mınıstrliginiń habarlaýynsha, adamdardyń tynys alýy qıyndap, dárigerge jıi qaralýda. Statısıkalyq kórsetkishke sáıkes, emhanaǵa qaralý jıiligi 15%-ke artqan.