(Bısmılláhır-Rahmanır-Rahım)

Haqtyń quly ediń,

Qazaqtyń qaısar uly ediń.

Turanda týyp,

Túnek túrmede túlediń.

Túnek túrmeni tilgilep ótken jasyndaı,

Sen degen, Táke, dalanyń ótkir tili ediń!

Sen degen, Táke, qazaqtyń ótkir tili ediń,

Qasqaıyp turyp, haqtyqty ǵana tilediń.

Shyndyq pen jalǵan janyǵa qarsylasqanda,

Jarq etip baryp jarylyp ketti júregiń.

Jarq etip baryp jarylyp ketti-aý júregiń,

Bir óziń, Táke, bir ǵasyrǵa azyq jyr ediń.

San jekpe-jekte jyrtylyp ketken qazaqtyń,

Dalasyn dal bop jyryńmen kóktep júr ediń...

Jyrtyǵyn kóktep dalanyń júrgen kezińde,

Nur oınap qanda, namysyń oınap kózińde,

Qarańdy baǵyp, qaraıǵan artta jaý baryn,

Sezseń de sezbeı qalǵansyń, Táke-aý, ózińde...

Lap etip laýlap janǵan shaǵyńdy keshirmeı,

Jalyndy jyrdy daýyldy Túnmen óshirmeı,

Tynbaıtyn tyńshy qaıda joq deısiń, máselen,

Mindetin ıt te óteı almas-ty esh úrmeı!..

Mindetin ótep artyńa túsken «Aqtaban»,

Jaýyǵyp saǵan, jaýyńnyń ditin aqtaǵan...

Qaıran erim-aı, qarǵa-quzǵynǵa jem etti,

Aryńdy sotqa,

Tánińdi otqa qaqtaǵan...

Ala qarǵalar aryńdy otqa qaqtady,

Mindetin solaı Aqtaban tóbet aqtady...

Sóıtse de bizge «Túnektiń syryn aıtsyn» dep,

Jaý saqtaǵan joq,

Allahym Ózi saqtady!

Allah saqtady!

Jyr alaýyńdy óshtirmed!

Qazaqtyń baǵyn qaıtpastaı etip kóshtirmed.

Kóbeńe ıne,

Úrpińe shıdi tyqsa da,

Saıraǵan qobyz – tilińdi jaýǵa kestirmed!

Saıraǵan qobyz – tiliń túnekti osqylap,

Túrme túbinen Turanǵa tartty kósh qulap...

Jarqyldap jasyn jaqsy áýen jatty talyqsyp,

Buryn da sońdy estı qoımaǵan esh qulaq.

Bul qaıdaǵy áýen?

Bul qandaı tátti án, jaryq?

Kelgendeı jaryq qaýyzyn ásem tań jaryp?..

Al, qane, ash jol, aqynyń keldi, aǵaıyn,

Aıaqta kisen...

Alshańdaı basyp Tańjaryq!

– Ássálámýǵaláıkým ýá rahmatollahı ýá bárákátúh!