Qyrǵyz Respýblıkasynyń Memlekettik ulttyq qaýipsizdik komıtetiniń bastyǵy Qoı-Tashta jappaı qyrýǵa buıryq bermegenine ókinedi dep jazady Qamshy.kz aqparat agenttigi 24.kg saıtyna silteme jasap.

Arnaıy operasıa kezinde qaza tapqan ofıser eldiń ońtústiginde terrorısterdi ustaý boıynsha arnaıy operasıalarǵa qatysqan. Bul týraly Parlament otyrysynda Memlekettik ulttyq qaýipsizdik komıtetiniń tóraǵasy Orozbek Opýmbaev málimdedi. Onyń aıtýynsha, Úsenbek Nıazbekovtiń Leıtenant degen laqap aty bolǵan. Ol 2006 jyly arnaıy jasaqtyń aǵa ofıseri bolǵan, sol kezde ol granatamen sodyrlardyń kózin joıyp, lańkestik áreketti boldyrmaǵan.

"Ol 2009 jyly Ózgendegi sodyrlarmen qaqtyǵysta birinshi bolyp ishke enip, barlyq isti tyndyrǵan. Úsenbek Nıazbekov jáne basqalar da qanshama arnaıy operasıalarǵa qatysty. Osy ýaqyt ishinde bir adam ǵana jeńil jaraqat aldy. Biraq ol kezde biz oq-dárisi bar, qarý asynǵan terrorısterge qarsy turdyq. Bul jerde eshkim Almazbek Atambaev qarýsyz jigitterge oq ata bastaıdy dep kútpegen. Sol kezde jappaı qyrýǵa buıryq bermegenime ókinemin", - dedi Orozbek Opýmbaev.

Sondaı-aq ol tańerteń Qaýipsizdik keńesiniń otyrysynda Sooronbaı Jeenbekovke otstavkaǵa ketkisi keletinin aıtqan eken. Óıtkeni bul oqıǵada MUQK basshysy óziniń kinási de bar dep esepteıdi.

Keshe túnde MUQK arnaıy kúshteri Qoı-Tash aýylynda eldiń burynǵy prezıdenti Almazbek Atambaevty ustaýǵa tyrysty. Alaıda, shabýyl sátsiz boldy. Atambaevtyń jaqtastary arnaıy kúshterdi burynǵy memleket basshysynyń úıine kirgizbedi. Ekinshi ustaý áreketi kezinde tártipsizdikter bastaldy. Jaraqat alǵandar men zardap shekkender bar. Keminde 50 adam Bishkek pen Shý oblysyndaǵy aýrýhanalarǵa jetkizildi. Álfa komandıriniń orynbasary myltyqtan jaraqat aldy. Ol aýrýhanada qaıtys boldy. Shý oblysy Ortalyq ishki ister basqarmasy bastyǵynyń basyna da oq tıdi. Ol komada jatyr.

Derekkóz: Zakon.kz