Ózbekstannyń burynǵy prezıdenti Islam Karımovtyń úlken qyzy Gúlnara Karımovanyń ústinen taǵy bir qylmystyq is qozǵaldy dep jazady Qamshy.kz aqparat agenttigi Azattyq Rodıosyna silteme jasap. Buǵan deıin Karımova qarjy qylmysyna baılanysty qamalyp, qazir Tashkent túrmesinde  jazasyn ótep jatyr.

Ózbekstan bas prokýratýrasy 19 tamyzda taratqan aqparatta Karımova eki sement zaýytyndaǵy memlekettiń úlesin "negizgi qunynan arzanǵa" zańsyz satyp alǵan jáne keıin sheteldik kásipkerlerge satqan degen kúdikke ilingen. Prokýratýranyń málimetinshe, kúdikti satyp alýshylardyń "keıingi zańsyz is-áreketin qorǵashtap, memleketke asa iri kólemde zıan ákelgen".

Buǵan qosa bas prokýratýra Karımova "azamattar men túrli kompanıalardyń ıelerin kúsh kórsetemin dep qorqytyp, olardyń múlkin ózine tıesili kompanıalarǵa aýdarýǵa májbúrlegen" dep habarlady.

Bir kezderi Ózbekstandaǵy yqpaldy tulǵalarynyń biri sanalǵan jáne kásipker ári ánshi retinde de tanylǵan Gúlnara Karımova 2014 jyly prezıdent ákesiniń qyryna ilingen soń kópshilikke kórinbeı ketken. Islam Karımov Ózbekstandy 1989 jyldan bastap 2016 jyly qaıtys bolǵanǵa deıin basqarǵan.