Ekaterınbýrgte (Reseı) bokstan ótip jatqan álem chempıonatynyń jartylaı fınalynda Bekzat Nurdáýletov Hýlıo Sezar La Krýzdy (Kýba) jeńip, fınalǵa joldama aldy dep jazady Qamshy.kz aqparat agenttigi. 

Jekpe-jekke qazylyq etken bes tóreshiniń tórteýi eki boksshynyń upaıyn teń dep (28:28) baǵalasa, bir tóreshi 29:27 esebimen jeńisti Nurdáýletovke berdi. 21 jasataǵy Nurdáýletov qarsylasyn ekinshi raýndta bir ret nokdaýnǵa túsirdi. 

Nurdáletov nokdaýnǵa túsirgen La Kýrýz Rıo Olımpıadasynyń jeńimpazy, álemniń tórt dúrkin chempıony. Ol áýesqoı boksta 2012 jyldan beri eshkimge jeńilmegen. Dál osy kýbalyq boksshy 2016 jyly Rıo Olımpıadasynyń fınalynda, 2011 jyly Bakýde, 2013 jyly  Almatyda ótken álem birinshilikteriniń fınalynda qazaqstandyq Ádilbek Nıazymbetovty utqan. 

Erteń, 21 qyrkúıekte ótetin fınalda Nurdáýletov ózbekstandyq Dılshodbek Rýzmetovpen judyryqtasady. Ózbekstan boksshysy jartylaı fınalda anglıalyq Bendjamın Ýıttakerdi jeńdi. 

Ekaterınbýrgta ótip jatqan álem chempıonaty erteń aıaqtalady. Qazaqstan boksshylarynyń arasynan fınalǵa Nurdáýletovten bólek, +91 kılogramda judyryqtasatyn Qamshybek Qońqabaev ta joldama aldy. Ol fınalda ózbekstandyq Bohodır Jalolovpen judyryqtasady. Al Sáken Bıbosynov, Abylaıhan Júsipov, Tursynbaı Qulahmet, Vasılıı Levıt jartylaı fınalda jeńilip, álem birinshiliginiń qola júldegeri atandy.