"Aqymaq bolmańyzdar!" AQSH prezıdenti Túrkıa basshysyna hat joldady

/image/2019/10/18/crop-112_-1_502x669_er-960x500.jpg

AQSH prezıdenti Donald Tramptyń Túrkıa basshysy Rejep Taıyp Erdoǵanǵa 9 qazanda joldaǵan haty jarıalandy. Hattyń kóshirmesin jýrnalıs Trısh Regan bólisti. Keıin Aq úı bul hatty Tramp jazǵanyn rastady.

Tramp hatynda "eger Ankara Sırıanyń soltústik-shyǵysynda áskerı operasıa bastasa, Túrkıa ekonomıkasyn joıyp jiberetinin" jazǵan.

Donald Tramp haty

"Eger barlyǵyn durys ári adamgershilikke saı jasasańyzdar tarıhta jaqsy attaryńyz qalady. Biraq is nasyrǵa shapsa, tarıhqa jaýyz bolyp enesizder. Aqymaq bolmańyzdar! Keıin habarlasamyn" dep jazǵan Tramp.

9 qazanda Túrkıa Sırıanyń soltústik-shyǵysynda áskerı operasıa bastaǵan. Túrkıa prezıdenti Rejep Taıyp Erdoǵannyń sózinshe, bul operasıanyń maqsaty - "DAISH terrorlyq uıymymen jáne kúrdterdiń qarýly jasaqtarymen kúres". Ankara osy operasıa arqyly Sırıanyń soltústik-shyǵysynda qaýipsiz aımaq quryp, Túrkıadaǵy sırıalyq bosqyndardy osy aýmaqqa ornalastyrǵysy keledi.

Halyqaralyq aqparat agenttikteri 9 qazannan beri Sırıanyń soltústiginen 150 myń adam bosyp ketkenin habarlady. Túrkıa operasıa bastaǵan kúni Tramp ákimshiligi AQSH bul operasıaǵa qatyspaıtynyn málimdep, Amerıka áskeri Sırıanyń soltústik-shyǵysyn tastap kete bastaǵan.

Sırıalyq kúrdter – AQSH-tyń "Islam memleketi" terorıstik tobymen kúreste negizgi seriktesi. Al Túrkıa kúrd jasaqtaryn "terrorlyq top" dep sanaıdy.

2016 jyly kúrdter Sırıanyń soltústik aımaǵyna baqylaý ornatyp, "Rodjaba – Soltústik Sırıa" federatıvti aımaǵyn qurǵanyn jarıalaǵan. Kúrdter qurǵan aımaqqa Jazıra, Kobanı jáne Afrın qalalary engen.

"Azattyq" radıosy

"Aqymaq bolmańyzdar!" AQSH prezıdenti Túrkıa basshysyna hat joldady

Qatysty tegter :

Pikir qaldyrý

Qatysty Maqalalar