Jambyl oblysy geografıalyq turǵydan ońtaıly ornalasýy ony elimizdiń jáne shet elderden kelgen ınvestorlar úshin qarjy salyp, is júrgizýge asa tartymdy aımaqqa aınaldyryp otyr. Al, qoınaýynyń kenge toly bolýy men topyraǵynyń shuraılylyǵy ónerkásip pen aýyl sharýashylyǵyn damytý arqyly ekonomıkaǵa kólemdi kiris túsirýge múmkindik beredi, dep jazady Qamshy.kz aqparat agenttigi. Tek, atalǵan sharýalardy júrgizýge nıetti tulǵalar men oǵan qarjy salýǵa daıyn azamattar tabylsa bolǵany. Bul rette, qarjy salyp, jumys jasaýǵa nıetti azamattardy tarta bilý asa mańyzdy.

Rasynda Jambyl oblysy ınvestısıa salý úshin asa tıimdi óńir. Óıtkeni, 144 myń sharshy shaqyrymdy alyp jatqan Jambyl jeri agrarlyq, ónerkásip salasy qarqyndy damyp kele jatqan, ekonomıkalyq jáne ıntellektýaldyq potensıaly qalyptasqan aımaq. Bul rette, ınvestorlar úshin óńirdegi taý-ken, tabıǵı gaz, hımıalyq, munaı óńdeý, tamaq jáne metalýrgıalyq, qurylys materıaldary men elektr energetıkalyq óndiristiń jolǵa qoıylǵany da bizdiń oblysqa kelýge túrtki bolary anyq.

Bir ǵana taý-ken óndirisi salasyndaǵy fosforıt, barıtti jáne marganesti rýdalardy, gaz óńdeý jalpy ónerkásiptik óndiristiń 7 paıyzyn quraıdy. Al, hımıalyq ónerkásip salasy elimiz boıynsha aldyńǵylar qatarynda. Óıtkeni, atalǵan sala oblystan eksportqa shyǵarylatyn taýarlardyń 70 paıyzyn alady. Al, elimiz boıynsha óndiriletin hımıa ónimderiniń úshten bir bóligin enshileıdi.Árıne, mundaı qazbaly baılyqtardyń mol mólsheri ken óndirýshilerdi qyzyqtyrmaı qoımasy anyq. Budan bólek, oblysymyz fosforıt pen ken óńdeýde qoldanylatyn shpattyń mol qoryna ıe. Sondaı-aq, Áýlıeta jeriniń qoınaýynan mys, altyn, kúmis, qorǵasyn, myrysh sekildi baǵaly metaldar, barıt, kómir, qurylysta paıdalanylatyn túrli sándik tastar men asbes, sement, keramzıt shıkizaty jáne gıpstiń qomaqty mólsheri bar.

Investısıalar tartý kezinde ózara is-qımyl jasaý reglamentine sáıkes jýyrda oblys ákimdigi kásipkerlik jáne ındýstrıaldy-ınnovasıalyq damý basqarmasynda «Djon Ban MetalProm» AQ – nyń ınvestorlarymen kezdesý ótti.

Kezdesýde «Djon Ban MetalProm» AQ jalpy quny 7,8 mlrd. tg quraıtyn myrysh oksıdi men qorǵasyn oksıdin óndiretin sehtardy qaıta qurý jáne qurylys materıaldaryn óndirý (kúıdirilgen kirpishter, trotýar plıtkalary) ınvestısıalyq jobasy tanystyryldy.

Jobany 3 kezeńmen iske asyrý josparlanǵan. Jobany iske asyrýmen barlyǵy 80-nen astam jańa jumys oryndaryn ashý josparlanǵan. Jıyn barysynda qurylys-montajdaý jumystarynyń óndiristik kestesi talqylanyp, jergilikti tehnıkalyq mamandyq ıeleri men jumysshylardyń qajetti resýrsyn tartý máselesi aıtyldy.

Kezdesý nátıjesimen Jambyl oblysy ákimdigi atynan oblys ákiminiń orynbasary N.Kalenderov jáne «Djon Ban MetalProm» AQ basshylyǵy ınvestısıalyq jobany súıemeldeý maqsatynda ózara áriptestik memorandýmǵa qol qoıdy.