Jambyl oblysynyń tabıǵı-klımattyq jaǵdaıyn eskere otyryp, sońǵy jyldarda aımaqta energetıkalyq potensıaldyń joǵarylyǵyna baılanysty, jańartylatyn energıa kózderiniń kún, jel jáne shaǵyn sý elektr stansıalarynyń qurylystary belsindi júrgizilýde, dep jazady Qamshy.kz aqparat agenttigi. Atap aıtsaq, 2010 jyly barlyq jańartylatyn energıa kózderi nysandarynyń jalpy qýaty shamamen 1,5-2,0 MVt bolsa, qazirgi tańda 10 JEK nysandary jalpy 168,7 MVt qurap otyr. Onyń ishinde 4 nysan sý elektr stansıasy jalpy qýaty 15,1 MVt, 3 nysan jel elektr stansıasy jalpy qýaty 53,1 MVt jáne 3 nysan kún elektr stansıasy jalpy qýaty 100,5 MVt.

Ásirese Jýaly aýdanynda ornalasqan «Býrnoe Solar» nysanynyń 2-shi kezeńindegi jalpy qýaty 50 MVt quraıtyn «Býrnoe Solar -2» nysanyn salý («Samruk Kazyna-United Green» JSHS) qurylysy 2018 jyldyń 4 maýsymda aıaqtalyp, iske qosyldy. JEK-tin ornatylǵan jalpy qýaty 100 MVt deıin jetti.

2018 jyldyń qorytyndysy boıynsha elektr energıasynyń kólemi 335,9 kVtsaǵat nemese jalpy kólemniń 145 paıyzdy qurady.

2019 jyly JEK kózderimen óndiriletin elektrenergıanyń úlesin 11,5 paıyzǵa deıin jetkizý josparlanýda.

Budan bólek jyl basynda ınvestorlar Sarysý aýdanynda 100 MVt –tyq jel elektr stansıalaryn salatyny málimdelgen. Joba boıynsha 233 gektar jerge jelden qýat óndiretin arnaıy qyryq qondyrǵy ornatylmaq. Olardyń árqaısynyń qýaty – 2,5 MVt quraıdy. Stansıa jylyna 350 mıllıon KVT/saǵ elektr energıasyn óndiredi dep josparlanyp otyr. Joba quny 130 mıllıon AQSH dollaryn quraıdy. Jobanyń qurylys jumystary aǵymdaǵy jyly bastalady dep kútilýde. Qurylys kezinde 200-300 adam ýaqytsha jumyspen qamtylady. Al atalmysh joba iske qosylǵan soń turaqty túrde 30-40 adam jumysqa ornalasady.

Elimizdiń energetıkalyq sektoryn strategıalyq transformasıalaý aıasynda jańartylǵan energıa kózinen óndiriletin elektr energıasynyń úlesin arttyrý, ekologıalyq taza energıa óndirý jáne atmosferaǵa kómirqyshqyl gazynyń shyǵandaryn azaıtý maqsatynda qolǵa alynǵan joba sátti júzege asatyn bolsa, 2020 jyly qazynaǵa ortasha eseppen 8,1 mlrd teńge paıda túsedi dep boljanyp otyr.

Aıta keteıik, jel elektrlik stansıa – jeldiń kınetıkalyq energıasyn elektr energıasyna aınaldyratyn qondyrǵy. Ol jel qozǵaltqyshynan, elektr togy bar generatordan, jel qozǵaltqyshynyń jáne generatordyń jumysyn basqaratyn avtomatty qondyrǵydan, olardy qurýshy jáne qyzmet kórsetýshi qurylystarynan turady. Jel energetıkalyq stansıalarda jelsiz kezeńge arnalǵan rezervti jylý qozǵaltqysh bolady.