Jambyl óńirine qarasty temirjolshy jastar eki kúndik aımaqtyq trenıńte bas qosty. Onynshy jyl qatarynan ótip jatqan sharaǵa bıyl barlyǵy 16 top qatysyp, ózderiniń zaman talabyna saı, ınovasıalyq ıdeıalaryn ortaǵa saldy. Temirjolshy jastardyń biliktiligin arttyryp, shyńdaı túsetin saıystyń alǵashqy kúninde qatysýshy komandalar ózderin tanystyryp, baıqaý sharttarymen qanyqty.

Trenıńtiń ekinshi kúninde jastar óz jobalaryn qorǵady. Al trenıń shartyna sáıkes, ádil qazilar alqasy jobalardyń Qazaqstan temir joly salasy úshin tıimdi tustaryna, ekonomıkalyq turǵydan qolaılylyǵyna, ony paıdalaný merziminiń uzaqtyǵyna, eńbek resýrstaryna basa mán berdi.

Shoıyn jolda ter tógip júrgen jastardyń usynǵan jobalaryna keler bolsaq, olardyń qatarynda túngi ýaqytta jáne órt bolǵan jaǵdaıda flúorıstsentti boıaýdy qoldaný, kún nurynan, jalpy kez kelgen sáýleden qýattalatyn tejeýish bashmak syndy jobalar qatysýshylar tarapynan qyzý talqyǵa tústi. Jastar sondaı-aq, elektrovozdy modernızasıalaýǵa, Shamalǵanda oryn alǵan oqıǵalar syndy apatty jaǵdaıdy boldyrmaýǵa, ınteraktıvti taqtaǵa baılanysty da jobalaryn jasap, komısıa múshelerine usyndy.

Jastar arasynda jobalarynyń búge-shigesine deıin eseptep, qorǵaı alǵandary da, keıbir ekonomıkalyq nemese basqa da tustaryn eskermeı, shıkileı usynylǵan, asyǵys jasalǵan jobalar da boldy. Keıbir qatysýshylar jap-jaqsy jobanyń tıimdi tustaryn komısıa múshelerine tolyqtaı túsindirip, jetkize almady. Biraq, jalpy alǵanda, talapshyl jastardyń temirjol salasyn jetildirý baǵytyndaǵy oı-pikirleri men tyń ıdeıalarynyń basym bóligi kóńilge qonymdy.

Baıqaý sońynda NODGP-8 bólimshesiniń bas ınjeneri Anatolıı Kım tóraǵalyq etken komısıa músheleri úsh topty jeńimpaz dep tanydy. Onyń birinshisi «Krúk» jobasy 1000 Vólttan joǵary deńgeıdegi elektr energıasyn ońtaılandyrýǵa arnalsa, ekinshi joba órt kezinde últrafıoletti boıaýdy paıdalanýdy usynǵan jastardyń tobyna buıyrdy. Úshinshi jeńimpaz top nusqaýlyqtardyń elektrondy bazasyn jasap, usynǵan bolatyn.

Kompanıa basqarmasynyń aımaqtyq-óńirlik ókiliniń úılestirýshisi Dáýletbek Nesipbekulynyń aıtýynsha, jeńimpazdar endi jobalaryn jetildire túsip, Nur-Sultan qalasyndaǵy respýblıkalyq baıqaýda baq synaıtyn bolady.