Tabıǵaty kórikti Jambyl oblysyndaǵy Jýaly aýdanynyń Shaqpaq aýyldyq okrýgindegi Táttibaı Dúısebaıuly aýylynyń ústindegi taý bókterinde «Qaralma» taý-shańǵy bazasynyń qurylysy ótken jyldyń jazynda bastalǵan. Oblys ákimi Asqar Myrzahmetovtiń bastamasymen qolǵa alynǵan demalys aımaǵynda oblys turǵyndary men qonaqtary bıyldyń ózinde-aq demalýǵa múmkindik alady.

Jobalyq quny 3 mlrd 355 mln teńgeni quraıtyn týrısik aımaq «İshki jáne kirý týrızmin damytý» jobasy aıasynda júzege asyrylýda. Jalpy keshenniń qurylysyna 274 ga jer telimi bólingen. Búginde taý-shańǵy bazasyna qajetti ınfraqurylymdar – jol, aýyz sý, gaz qubyry jáne elektr qýatyn tartý jumystarynyń deni oryndalǵan. Aýylǵa kireberisten solǵa qaraı taý bókterine deıin kósilgen keń jolaqty avtojoldyń qurylysy aıaqtalýǵa jaqyn. Ony tarazdyq «Aııa-Servıs» JSHS salyp jatyr. Dál qazir tikeleı baza ornalasatyn taý bókterinde boı kóteretin kotejder qalashyǵynda qurylys jumystary qyzý qarqyn alyp otyr. 17 kotejdiń irgetasy orny qazylyp, quıylýda. Keıbir kottejderdiń qabyrǵasy qalanyp, tóbesi jabylyp jatyr.

Demalys aımaǵynda kásibı deńgeıdegi syrǵanaý joldary jasalyp, zamanaýı úlgidegi aspaly jol teńiz deńgeıinen 2000 metr bıiktikke taýdyń ushar basyna deıin ornatylatyn bolady. Oǵan qajetti jabdyqtardyń barlyǵy tolyǵymen jetkizilgen.

Qary qalyń, qysy uzaqqa sozylatyn aýdannyń tabıǵaty jyl on eki aı boıyna týrıserdi tartýǵa taptyrmaıtyn oryn. Tek aýa raıy ǵana emes, logıstıkalyq jaǵynan da tıimdi aımaq. Bul jer kórshiles jatqan Jambyl jáne Túrkistan oblystarynyń qaq ortasynda, halyqaralyq «Batys Eýropa-Batys Qytaı» avtodálizinen de qol sozym jerde tur. Bul týrıserdiń jol-jónekeı soǵyp, emin-erkin demalyp ketýine múmkindik beredi.

Taý-shańǵy kesheni eýropalyq standarttarǵa saı salynýda. Ol iske qosylǵanda táýligine úsh myńǵa deıin saıahatshyny qabyldaıtyn bolady. Munda týrıserge barlyq sporttyq-saýyqtyrý jáne mádenı-oıyn-saýyq qyzmetteri kórsetiledi. Olar qoljetimdi baǵaǵa sapaly qyzmet alyp qana qoımaı, taýdyń jupar saf aýasymen tynystap, jan qalaýyna saı demalatyn bolady. Qonaqúıler men meıramhanalardyń esigi aıqara ashylady.

Taý shatqalyndaǵy jumystar memlekettik-jekeshelik áriptestik aıasynda jalǵasady. Jospar boıynsha keshenniń qurylysy jeltoqsan aıyna deıin aıaqtalyp, paıdalanýǵa berilmek.

Oblystyq týrızm basqarmasy joba júzege asqan jaǵdaıda óńirdegi ishki jáne kirý týrızminen týrısik aǵym orta eseppen 45 000 týrıske kóbeıedi dep boljamdap otyr.