Qazaqstannyń burynǵy premer-mınıstri Ákejan Qajygeldın Qazaqstanda qurylǵaly jatqan jańa partıaǵa qatysty pikir bildirdi, dep jazady Qamshy.kz aqparat agenttigi. Qazir Londonda turatyn saıasatker "Táýelsiz polıton klýbyna"  suhbat berdi. 

– Qalyptasqan jaǵdaıdy ózgertý kerek. Qazirgi jaǵdaı halyqqa qarsy. Halyqtyń múddesine qarsy. Bul júıeni ári ketse 250-300 shaqty azamat, shirigen baı, namyssyz, arsyzdar basqaryp otyr. Sol qalyptasqan júıeni ózgertý úshin partıa kerek. Sol úshin bizge Bergeıler, Janbolattar kerek. Nazarbaev "barlyǵyn shetelge qýyp shyqtym, uıqym tynysh, jaǵdaıym jaqsy" dep oılap otyr ǵoı. Onyń oılaǵany iske aspaıdy. Men birneshe ret bılikke jastar keledi dep aıtqanmyn. Aıtqanym dál keldi. Qazirgi júıeni, jaǵdaıdy ózgertý kerek, – deıdi Qajygeldın. 

Sonymen qatar, Ákejan Qajygeldın júıeni ózgertý úshin jastar birigýi kerektigin aıtty. 

– Jastar jınalýy qajet. Bir emes, eki nemese úsh partıa ashylýy kerek. Jańa partıaǵa muqtajbyz. Birigip bir baǵdarlama jasaýy kerek. Qandaı baǵdarlama? Bılikti ózgertý, Konstıtýsıany ózgertý eń basty baǵdarlama bolýy kerek. Ózimiz 18 mln ǵana halyqpyz. Eki-úsh partıa birigip, saılaýǵa qatyssa, jetip artylady. Tek birlik qajet. Partıalardyń eń basty qateligin aıta keteıin. Kópshiligi biz opozısıalyq partıamyz deıdi. Biraq jer kóterilisinde halyqty oılaıtyn partıalar qaıda boldy? Jańaózende qantógis bolǵan kezde partıalar qaıda qaldy? Sol kezde ún qatyp, eldiń jaǵdaıyna alańdaǵan Janbolat sekildi jastar bolatyn. Mine, solar saıasatqa aralasyp, partıa qurýy kerek. Maks ta ómir boıy túrmede otyrmaıdy. Ol da jaqynda bostandyqqa shyǵady. Mine, halyqty jetekteıtin jigitter. Bergeı bar. Janbolat bar. 9 maýsymdaǵy jaǵdaı esterińizde shyǵar?! Jigitter kóshege shyqty. Búgin namysty qoldan bermeıtin jas jigitter bar. Biz de qoldan kelgenshe kómek kórsetemiz. Halyqtyń aýzynan jyryp alǵan ushaqtaryn, ıahtalaryn, saraılaryn kórsete alamyz, – deıdi Ákejan Qajygeldın. 

Suhbat sońynda Ákejan qajygeldın sheteldegi qazaqtardyń qosylyp, mańyzdy isti bastaǵanyn aıtty. 

– Qoldan kelgenshe, 2 jyldaı "Jańa Qazaqstan" degen qozǵalystyń jumystaryn jasadyq. Qazir sheteldegi qazaqtardy qoldaıtyn "Zagranbúro" degen uıym bar. Bárimiz basymyzdy qosyp birneshe mańyzdy, úlken is qozǵap jatyrmyz. Muny AQSH-taǵy Senat arqyly Ulybrıtanıada bastaǵan bolatynbyz. Biz sotqa nemese organdarǵa baramyz. Bolmaı bara jatsa, Parlamentke deıin jetemiz. Biz Qazaqstandaǵy shendilerdiń sheteldik bankilerdegi múlkileri men aqshalaryn konfıskasıa jasaýǵa tyrysyp jatyrmyz. Eger oılaǵanymyz iske assa, keleshekte Qazaqstanǵa qaıtarýǵa múmkindik bolady. Qazir qolymyzdan kelgeni osy. Kezinde Nazarbaev halyqty qorqytyp, jastarǵa "árbireýińdi jetektep sotqa aparamyn" dep aıtyp edi. Al biz Nazarbaevtyń ózin sotqa aparamyz. Osyny iske asyramyz,  – deıdi Qajygeldın. 

Qajygeldın bul iste nátıje baryn da aıtyp ótti. 

– Eń birinshi Darıǵa Nazarbaevadan bastaıyq. Nátıje joq emes. Jaqynda estıtin bolasyzdar, – dep qysqa qaıyrdy Qajygeldın. 

Saıasatker bılik jańa partıany tirkemese, halyqtyń kóshege shyǵý kerektigin aıtty. 

– Partıany tirkeý, tirkemeý partıa músheleriniń qolynda. Eger tirkeýden ótpese, kóshege shyǵaıyq, úndeý jasaıyq. Qazaqstandaǵy sheteldegi elshilikterge barý kerek. Sebebi OBSE múshesi, Qazaqstan Eýropadaǵy qarym-qatynasty nyǵaıtqysy keledi. Sol jaqqa jaqsy kóringisi keledi. Biz de kómektesemiz. Qolda qarý bar. Tek durystap qoldanýymyz kerek. Kezinde Respýblıkalyq partıany da tirkedi. Biz barlyq kúshimizdi saldyq. Osy joly da tirkeıdi. Qaıda barady? Eger birigip jumys istesek, bılik tirkeıtin bolady. Tek aryz jazyp qana qurqol otyrmaýymyz kerek. Kóshege shyǵýǵa da daıyn bolǵan jón. Sol kezde partıanyń kúshin kórsetemiz. Jaı ǵana qaǵazdaǵy partıa músheleri emes, partıanyń jetekshileri, lıderleri alańǵa shyǵamyz dep shaqyryp, kelesi kúni adamdardyń barlyǵy alańǵa shyqsaǵ partıa bar degen sóz. Eshkim alańǵa shyqpasa partıanyń joǵyn bildiredi, – dep sózin aıaqtady Ákejan Qajygeldın.